食飯唔使左揀右揀｜6間荔枝角美食小店（下）

上回介紹完集中於荔枝角商場的優質食店，今次就介紹同樣優質並分散於工業區不同角落的小店。由外賣快餐至坐得舒適的樓上Cafe都有。不論港式、台式、日式或越式都有好選擇。其中一間更設有早餐時段，啱晒食個靚早餐先開工。荔枝角嘅打工仔的確有福，早、午、晚三餐都有好著落！

① 齊柏林熱狗｜邪惡熱狗漢堡快餐之選

想食漢堡薯條但又唔想幫襯金拱門？齊柏林就係快靚正之選。以自家製熱狗起家的齊柏林今年開業第九年，分店已超過20間，遍佈港九新界，而荔枝角工業區就有一間！雖然分店多以外賣為主，但因經常推出超值套餐及限定口味，仍吸引不少打工仔捧場。人氣之選莫過於開業以嚟最受歡迎的火炙芝士辣肉醬熱狗及澳式風情熱狗；漢堡方面就有Double漢堡扒及墨西哥勁辣雞漢堡，單點或可加配薯條、薯餅等小食及飲品升級至套餐。唔夠喉還有邪惡拉絲芝士大薯條選擇。最近齊柏林更推出外賣自取APP，會員可以食住儲分之餘更可預先下單省卻排隊時間添！

（左）齊柏林Double漢堡（單點$58，套餐$72）
（右）墨西哥勁辣雞漢堡（單點$44，套餐$58）

【齊柏林熱狗店】

地址：青山道489-491號香港工業中心A座地下A6A號舖
營業時間：11:30am – 9pm
IG：zeppelinhotdog
FB：Zeppelin Hot Dog

② 黑布小巷（有早餐）｜台式大件足料吐司

2020年開業的「黑布小巷」以台式吐司及自製芋圓打響名堂，兩年前進駐荔枝角樓上更大的舖位。雖然位置有點隱蔽，但憑著多款台式美食，每逢午市也座無虛席，連外賣訂單也接不停，皆因不少附近打工仔都喜歡外賣吐司食個快Lunch！食店餐牌選擇多，由招牌吐司、牛肉麵、便當、夜市小食至手工芋圓糖水都一應俱全。當中吐司推介較受歡迎的有慢烤雞腿蛋吐司，炒蛋夠滑身，雞腿醃得夠入味；還有堂食限定的黑松露焦糖洋蔥日本飛驛牛芝士蛋吐司。除了午市及晚市，更設有早餐時段，早上10時開始供應多款吐司及蛋餅，均贈送一杯飲品，啱晒食個靚早餐先返工！

【黑布小巷】

地址：長沙灣道883號億利工業中心4樓405室
營業時間：11:30am – 9:30pm
IG：hakpo_alley
FB：黑布小巷

③ Viet House｜自製肝醬多「茜」越包

講到食越南法包，唔係間間都有自家製肝醬。而荔枝角這間 2023 年尾才開業的外賣小店 Viet House，就主打自家製肝醬的越南法包及自家特調檬汁的撈檬。越南法包共3款，包括經典雜錦包、香茅雞肉包及豬扒包。每個法包都足8吋，食一個都已經夠晒飽。其中的經典雜錦包餡料豐富，先塗上自家製肝醬及蛋黃醬，再放入腩肉、燻蹄、青瓜、醃蘿蔔等餡料，喜歡芫荽的朋友更可要求多荽增加風味！如想食撈檬或飯都有不同款式選擇，例如香茅雞翼、越式札肉等，均附上自家調配的檬汁，酸酸甜甜夠晒開胃。大家可使用店家whatsapp提前落單，最快10分鐘就有得拎！

【Viet House】

地址：荔枝角長沙灣道億利工業中心地下6號A4號舖
營業時間：11:30am – 3pm；6pm – 8pm（星期一至五）、11:30am – 5pm（星期六）（逢星期日及公眾假期休息）
IG：viethouseltd

④ 小念頭｜日式定食配手工蛋糕

幾年前以 IG 蛋糕網店起家，到兩年前擴展進駐荔枝角開店的「小念頭」，主打日式定食及精緻甜品。主食方面，店主推介秘製豚肉角煮定食，用秘製醬汁炆煮超過兩小時，肉質軟綿入味。如想食意粉就可試試創意雲吞麵，以手工炸蝦雲吞配尼泊爾特色醬汁煮的意大利麵，而各款主食可加配不同前菜及冷盤，夠晒豐富飽肚。輪到店家的馳名手工蛋糕，每天提供4至5款口味，其中的招牌奶蓋戚風蛋糕設有多款口味，午餐更可以優惠價加配。小店環境不僅闊落坐得舒適，而且食物種類多，食飽仲可以歎杯茶解膩，啱晒忙完一個朝早或收工與朋友敘舊慢慢傾。

【小念頭】

地址：長沙灣道883號億利工業中心9樓903號舖
營業時間：11:30am – 9pm
IG：littleideacakeshop
FB：小念頭

⑤ 華山咖啡（前龍華軒）｜人氣港式卡邦尼腸粉

在旺角屹立十年的龍華軒自去年底結業後，今年初帶著招牌菜卡邦尼意粉/腸粉，選址於荔枝角並改名為「華山」重新出發。食物方面繼續有招牌卡邦尼意粉/腸粉，亦保留了同樣受歡迎的泰式辣牛肉意粉。不過人氣雞翼放題暫時未上架，如大家想試齊4款雞翼口味，不妨order雞翼拼盆，味道包括鹽香、蜜糖、蒜香和香草。新店空間寬敞，並沿用龍華軒的港式街市吊燈和紙皮石牆身，充滿懷舊氣息及熟悉感，啱晒香港仔女坐低食個Lunch，飲杯咖啡傾吓偈。

【華山咖啡】

地址：長沙灣道794號2樓
營業時間：2pm – 9pm
IG：wahshan.coffee
FB：華山咖啡

⑥ 港佬車仔麵｜必點爽口大粒墨魚頭

車仔麵除了要大碗夾抵食，湯底及配料亦十分重要。在荔枝角開業四年的「港佬車仔麵」配料就多達47款，當中的招牌墨魚頭及牛腩更是招牌餸，不少食客大讚墨魚頭份量足，口感亦十分爽口彈牙。另外，自家製豬肉豆卜亦是人氣之選。如有選擇困難症，推介至尊招牌大雜麵，配料有牛腩、墨魚頭、炸蝦卷、冬菇、豬紅、蘿蔔及豆卜，喜歡吃辣的話不妨選擇秘製醬辣醬，辣度由BB辣至大辣都有得揀，還可免費加辣菜脯增加風味，如想食得更健康可轉為菜底。