自肥可恥，但很有用，講的是本地手工啤品牌香港城釀（Citibrew），創辦人Eric因為鍾意飲酒，於是以實驗性質開設全港最細的精釀啤酒廠，至今已創作出超過40款口味獨特的手工啤，新產品亦陸續有來，如此勤力，並非因為發錢寒，而是基於一個信念：「唔想變廢老！」
文、圖：瑩（部分相片由受訪者提供）
初心不變 一切從「港女」開始
2014年年底，Eric想以自己喜歡的啤酒為媒介，承載他對香港的情懷，無奈身家只有5位數字，唯有靠開辦當時尚未流行的家釀啤酒班來滾存資本，經過半年努力，Citibrew終於誕生，500平方呎的廠房內，只有4個100L的發酵缸，是當年全港最細的精釀啤酒廠，「人哋叫小型啤酒廠做Micro brewery，我叫自己做Nano brewery。」
廠房雖小，志氣卻不小，市場定位亦十分明確，就是釀製令香港人開心、有共鳴的手工啤，鼓勵香港人飲香港啤，以味道傳承本土故事。首款推出市面的產品，正是極具爭議的「港女IPA」，回想當年，港女是等同物質主義的絕對貶義詞，偏偏Eric要為它平反，「最初反應真係一般，好多人恥笑我哋改錯名，但飲完會發現除咗平時IPA應有嘅果香，仲因為加入花椒、茴香同果皮而有少少回麻，識欣賞其實好有層次，所以英文名叫Tough lady，用嚟凸顯香港女仔嘅特質。」
近年曝光率最高的產品，一定非「我城正在…」系列莫屬，由「沉睡Milkshake IPA」、「指示NE Pale Ale」、「逆流Apricot Witbier」及「閃耀Earl Grey Porter」組成，因Label上的畫面別具意義，經常出現在大小良心商店的貨架，亦多得廠房於2018年搬遷，發酵缸由原來的4x100L，增產至6x700L，產量得以提高，「去年疫情亦帶嚟唔少影響，以前7、8成產量供應畀餐廳、酒吧，而家零售變咗主力。」
黃唔黃唔係單靠把口
正所謂明就明，唔明就黎明，從「港女IPA」的擔遮動作，到「Be Water DDH Brut DIPA」的文案宣傳，同路人看Citibrew，自然心領神會，但原來在強烈的訊息與鮮明的立場背後，品牌從未正面表態，除因Eric嫌棄畫公仔畫出腸的庸俗，其實亦暗藏生意人的智慧：「消費者希望將錢使得其所，振興經濟圈，當然無可厚非，但作為經營者，只要我賺到嘅錢用得其所，根本唔應該拘泥於佢嘅來源，之前有人問我啲酒擺唔擺上天meow賣，我都毫無懸念答：『擺！賣貴啲，賺晒佢哋啲錢！』不過對方聽完之後無再搵我之嘛。」
用得其所的其中一個例子，就是支援與栽培後輩，才30出頭，已急不及待將Lead Brewer的位置讓給97年出生的Harry！「佢而家24歲，我24歲先誤打誤撞開始創業，但佢而家已經掌握到一間啤酒廠嘅運作同釀酒技術，換句話說，佢來到我今日呢個年紀，佢嘅能力應該可以超越今日嘅我，一代人比一代人進步，呢個先係我樂意見到嘅情況。」
Harry的入行經過，說來亦有點神奇，大學時期無酒不歡，自從與朋友到訪太子道的手工啤酒吧初嘗Citibrew「第三者Gose」後，便對啤酒完全改觀，漸漸迷上手工啤變化多端的特質，索性在酒吧兼職Bartender，結識了Eric，二人更變成室友，Eric借出釀酒有關的書予Harry閱讀，眼見他興趣滿滿、孜孜不倦地增進相關知識，去年年底便索性邀請他到Citibrew工作，化理論為實戰，在他帶領下，團隊8月新推出名為「玫瑰蜜月Rosé」的有汽蜂蜜酒，以Citibrew暢銷的龍眼蜂蜜酒「蜜月」為藍本，加入玫瑰花和本地種植的洛神花來營造浪漫的粉紅色調，Harry形容，這是一款戀愛主題作品。
手工啤之魂 拒絕墨守成規
環顧全港近廿個手工啤品牌，似乎沒有一個拍得住Citibrew推陳出新的速度，6年來已先後釀製出超過40款不同口味的手工啤，完美示範大膽創新的精神，「其實我相信，做得手工啤，都一定係追求獨立自主、嚮往自由創作、反對壟斷、拒絕墨守成規嘅人，只係我好怕留喺comfort zone，好怕停落嚟，唔覺意變咗廢老，所以先不斷搵新嘢搞。」Eric解釋。
除了自家創作，Citibrew亦跟達明Crossover 
第13屆香港獨立電影節的黑色白啤也是旗下出品。
Eric口中嘅新嘢，除了Citibrew的產品，還有今年愚人節推出的「東江水」透明啤酒，以及最近成立的服裝品牌809等，「東江水係因為想突破以往愚人節淨係出post嘅傳統，於是請教香港蒸餾所而做出嚟嘅限量產物，只送不賣；至於809，其實係同事想探索嘅新project，我好鼓勵大家係釀酒之餘開拓唔同業務，正如我都有唔同嘅範疇想研究，人生無理由只有一個技能或者一份職業㗎嘛。」如此設身處地為後輩設想的年輕領袖，放棄他們實在是某一代人的損失。
Citibrew出品如此多，到底點飲先最好？Harry推介以下品飲次序（從右至左）：
1）「第三者Gose」– 鹹鹹酸酸的味道能令人對手工啤改觀，打開味蕾嘗試不同的口味；
2）「桂花Pale Ale」– 清香的桂花配搭輕型的酒體，容易入口；
3）「蜜麥Amber Ale」– 加入蜜糖釀製的麥啤，味道較濃，層次亦更豐富；
4）「Be Water DDH Brut DIPA」– Citibrew顯功架之作，酒精濃度達9%，入口卻如水清純，啤酒花與麥芽的香氣更是誘人；
5）「蜜月Mead」– 以非啤酒的蜂蜜酒作結，甜甜蜜蜜，有還原靚靚拳之效。
【Citibrew香港城釀】
Facebook：Citibrew HK 香港城釀
Instagram：@citibrewhk
網站：bit.ly/3yCDAdl
