「時間早一秒一秒走，時間的初衷總要守～」主題曲一響，大家便知是由ToNick主音趙善恆自編自導、周國賢主演的港產片《一秒拳王》，熱血拳擊、父子親情、拼死精神……上映當時，尤如一記後手重錘直擊港人內心，賺盡觀眾的熱淚與好評。近月，電影中的「英毅拳館」竟走進現實，這間落戶觀塘、佔地近5,000呎的拳館雖無明禎BB手把手教「大笑瑜珈」，卻是Boxing、泰拳、散打課程樣樣齊。加上有身兼電影特技人、前散打港隊及《一秒拳王》助理武指身份的館主麥嘉豪坐鎮，熱血程度與人生故事絲毫不比電影遜色，即使拳館開業不久就屢遭疫情打擊，但他選擇迎難而上、積極面對，這種態度或許正正應了《一秒拳王》中那句金句：「避唔到，一齊捱！」

文：Layne
圖：Layne、受訪者提供

慶功醉後創英毅 望延續「一秒精神」

位於觀塘的「英毅拳館」於2021年11月21日開幕，開業不足半年已接連因疫情而多次停業，但館主麥嘉豪（Matt）師傅的心態卻異常積極、表示毫不擔心，「因為香港人『餓』得太耐，只要防疫措施一放寬，大家就會出返晒嚟學，加上目前大家冇得去旅行，其實根本冇地方去發洩生活上的負面情緒。就算之前疫情暫緩、一節最多只能有8位學員同時上堂的時候，最高峰時期一節都會有至少十四、五人報名參加，其中以放工後7pm至9pm三節最受歡迎。」Matt 師傅的言談語氣透著自信與堅毅，讓人不禁聯想起《一秒拳王》的名言：「我們的超能力就是『不會放棄』。」

身為《一秒拳王》的助理武指，Matt 師傅回憶起2019年拍攝電影時，與周國賢、趙善恆、張建聲幾位劇中演員的訓練過程相當深刻：「拍攝時正值社會運動最巔峰的時候，每日與演員訓練前都要睇新聞、排除萬難才去到拳館，幾個男人打大赤肋喺天台訓練，突然間好似建立咗一種兄弟情。」

拍攝時深刻的經歷，讓 Matt 師傅將這套電影視為自己心血，亦希望用自己擅長的方式——「教拳」將電影延續下去，於是他膽粗粗在《一秒拳王》的慶功宴上，藉著酒意向監製提出開設「英毅拳館」的想法，不料監製竟爽快地一口應允：「當時我問監製：『不如開返間英毅拳館呀！有冇版權㗎？』，跟住佢一口就話：『個版權咪喺我到囉，我話得就得㗎啦。』當時我仲心諗『係真唔係呀』。」相隔數日， Matt 師傅再次聯絡監製確認，才肯定可以放手施為。

「當時大概係2021年6月，我接咗一套Netflix嘅電影，月中要出發去英國拍攝，但係6月頭先決定要搞英毅拳館，得15日時間去處理選址、組成拳館班底、籌備資金等事前工作，其實係一個好大嘅挑戰嚟。」話雖如此，但此事又點難得到曾多次開設拳館的Matt師傅，歷經約半年拍戲、開館兩頭忙的時間，「英毅拳館」於同年11月尾落戶觀塘，除了設有由三位現役、退役散打港隊及泰國拳王輪流指導的拳撃、泰拳、散打課程外，還提供重力訓練設施及電影主題休息區，佔地近5,000呎，遠比《一秒拳王》中的「英毅」豪華。

疫情下逆市開設拳館，驚人的魄力與堅毅源自 Matt 師傅多年的習武經歷：15歲開始習武，練過跆拳道、蔡李佛、泰拳、散打……而他的人生經歷如其武術門道一般豐富多彩、斑駁陸離，做過電影台文職實習、迪士尼煙火師、加入過香港散打代表隊；三十歲出頭加入特技人訓練班，試過拍戲捱足六日六夜蚊釘蟲咬、撻過污糟垃圾水，種種磨礪煉成了這位《一秒拳王》助理動作指導：「《一秒拳王》給予我最大的感受就是當中『永不放棄』的精神，除了戲內情節，就連戲外的香港亦正面臨重大事件，我覺得它是一件因緣際會下誕生、充滿正面意義的結晶。」

「高齡」特技人打到拍Netflix

如果說《一秒拳王》是 Matt 師傅開設「英毅」的契機，那麼對電影的熱情便是他拼命堅持的原因：「一方面我想在香港推廣改變了我人生的散打運動，另一方面我認為英毅背後的精神來自電影《一秒拳王》，所以我希望能用英毅拳館回饋返畀呢個電影產業。」 Matt 師傅自言自幼已經充滿表演慾，加上習武，長期浸淫於武打氛圍，一直想拍動作戲、成為一名特技人，2003年曾嘗試投考電影台動作特技組，但「一套拳都未耍完，好快就畀人叮走」，礙於技術不足而被逼暫時放下理想。

直至後來在迪士尼擔任處理舞台特別效果的煙火師時，結識了一位曾為動作指導的同事，在他的鼓勵下，才半推半就地厚著面皮、以30歲「高齡」報名投考香港動作特技演員公會舉辦的特技人訓練班：「有次傾偈，我同嗰位同事講笑咁話，『喂！你有冇啲老臨（臨時演員）畀我搵下外快呀，扮下死屍都得㗎喎。』，跟住佢話：『阿Matt你咁好身手，你不如直頭做武師啦。』」自覺「年事已高」的 Matt 師傅第一反應是「唔好啦，我十幾年前去考都衰咗啦，無理由宜家一把年紀先嚟考㗎嘛。」，同事卻說：「我覺得你得喎，我都係動作指導級㗎嘛，我唔會跣你嘅。」於是他在2015年毅然報名參加訓練班，最終在200位選30位的選拔中脫穎而出，正式向自己的理想職業邁進。

「講真，我喺訓練班入面嘅年紀真係比較大，其他同學可能廿零歲，最細嗰個甚至得16歲，我足足大佢一倍有多呀。我身手又唔係特別好，佢哋全部識『翻打撻』，我就淨係識『打』㗎啫。」怎料他正式開展特技人生涯後，由一開始的信心不足，到後來變得越做越起勁，一做就做了將近十年，參與過大大小小的動作拍攝，拍過警匪片《狂獸》、校園片《大師兄》，上年6月更與香港十六位武師一同受邀遠赴英國，以特技人身份拍攝由Tom Hardy主演的Netflix動作驚悚片《浩劫》（Havoc），以另類的「港隊」身份去外國拍戲，對此Matt師傅感到無比自豪：「就算香港嘅電影工業真係走下坡，但係喺外國人眼中，香港動作電影始終係世界級！」

「我一定要代表香港上一次擂台！」

事實上，除了在近年成為「特技人港隊」， Matt 師傅早在2017年就曾因為勝出香港武術聯會舉辦、一年一度的散打比賽「香港盃」，而獲邀加入香港散打代表隊，當時他32歲：「其實我嘅正職係拍戲，但是加入港隊後需要為同年的世錦賽備戰，拍戲之餘要到安徽進行訓練，變相要香港、安徽兩頭騰，訓練時要放低香港所有拍攝；為了顧及拍攝，又不能在訓練中受傷。要同時兼顧兩邊，當時我都覺得幾吃力。」 Matt 師傅表示，當時最高峰試過連續十日進行高強度體能訓練、與大陸散打省隊選手對練，返到香港都冇得唞，隨即就要前往拍攝由甄子丹主演的電影《大師兄》，Chur到爆的行程讓他永世難忘。

旁人聽到如此勞累的行程，相信亦不禁為之嘩然，作為當事人，又有什麼信念令他堅持參與搏擊運動？ Matt 師傅笑言：「信念其實就係『港隊』呢個名，因為我覺得可以代表自己嘅出生地——香港，係我畢生最大的夢想，所以當我知道我可以入港隊嘅時候，我係不顧一切，淨係諗住『我唔理！我一定要做到，我一定要代表香港上一次擂台！』」因為這份與香港人身份榮辱與共的認同感及體育家精神， Matt 師傅咬緊牙關與隊友一同殺入在俄羅斯喀山主辦的2017年世界武術錦標賽，雖然最終港隊未能在男子散打項目取得獎牌，但對他來說已經是莫大成就：「成績係點樣都冇辦法，唔到自己控制，只要可以代表到香港就好足夠。」

Matt師傅又指出，過往香港政府投放在搏擊運動的資源嚴重不足，以前幾乎所有散打運動員都沒有資助，只能在向公眾開放的鯉魚門散打訓練場「操拳」，「但係呢兩年政府開始著力支持香港運動，加上奧運先後有張家朗與何詩蓓奪金。他們開始願意投放資源在其餘體育運動，近年散打亦被列入體院培訓項目，在醫生、物理治療師支援，或者各樣訓練都有很大幫助。不過距離運動員可以『唔憂柴唔憂米』，始終還有一段很大的距離，但不失為一個好開始。」

冇最好打嘅功夫，只有最好嘅覺悟

雖說香港政府對搏擊運動的態度有所改善，但要深入推廣這種望落「拳拳到肉」的運動，也要靠Matt師傅一眾有心人扭盡六壬：「以前好興嗰排有咩戲、功夫聽得多，香港人就會跟住個潮流學，可能有套戲拍出嚟動作好華麗嘅，然後又會有好多人去學，學完之後又會話『嘩，原來都辛苦喎，點解我做出嚟冇套戲咁靚嘅？』，隨之流失九成新加入的學員。」但 Matt 師傅認為哪怕九成學員三分鐘熱度，只要有一成人願意留下來繼續參與搏擊運動，這便足矣：「我覺得電影對搏擊運動的幫助很大，兩者屬於相輔相成，至少可以增進人們對泰拳、拳擊、散打等運動的認識。例如我們想推廣散打運動，就要不斷去『煲』呢樣嘢，而目前英毅亦開始著力與各方合作，搞一啲散打嘅館內賽、業餘賽，希望至少提高曝光率，令大家知道散打是在一個無繩的擂台進行、打拳腳摔的搏擊運動，慢慢令香港人唔再三分鐘熱度。」

另一方面，Matt師傅也發現近年許多網民推祟「全民練武」， 令不少學員在心態上也開始蛻變：「以前我哋教拳都話，學武三件事：減肥、健康、保護自己，其實呢個初衷係冇變過，但係近年多咗人會嚟問，『如果我想保護自己應該學咩好呀？學泰拳好呀，定係散打好呀。』宜家佢哋會開始識去諗，咩搏擊運動會比較適合自己，或者在現實生活中能夠用返出嚟。不過其實計我話，冇話邊種功夫最好打，只係睇你肯唔肯練囉。」Matt 師傅的意思即是，所謂「全民練武」的重點並不應該放在修習哪種武術，而是大家的自我覺悟有多高，「肯練」永遠比「練得好」重要。

【英毅拳館】

價錢：$999（單月購買）；$799/每月（半年package）；$699/每月（一年package）
地址：觀塘觀塘道398號Eastcore 2樓02室 
營業時間：11am – 9pm（星期一至日）
Facebook：英毅拳館Ying Ngai Boxing Gym
Instagram：@yingngai.kt
*由於疫情關係，為配合政府防疫措施，拳館暫停營業，最新開放詳情有待官方公佈。