結婚是人生大事，就算近年因為疫情問題，新人未能大排筵席，但可以穿上一襲華麗的雪白婚紗、接受親友祝福，絕對是很多女生夢寐以求的一刻。於2020年開設婚紗小店「慧子婚紗」的90後 Maggie ，開店以來堅持為有經濟困難的基層提供婚紗義租服務，遇過有人轉售自己免費贈予的婚紗，亦見過為慳擺酒錢而要求義租的怪客。Maggie 因此試過放棄，但看著疫情中無所適從的準新人們，她兩星期前決定重開本已在今年年頭終止的義租服務，為亂世間的一對對愛侶帶來由衷的祝福與支援。
文：Layne
圖：Layne、受訪者提供
結婚遇黑店 銳意創良心婚紗舖
「起初我自己都沒有想過會開婚紗店，事源我2018年結婚的時候，幫襯了一間婚紗黑店，搞到好『捩棄』。表面上宣傳照好靚、價錢又相宜，實際上租落發現好多唔妥、好多隱藏收費。攞衫的時候更發現婚紗有污漬又穿晒窿，最後唯有拿拿臨自己買齊結婚用品與婚紗晚裝。」談吐爽朗的 Maggie 說起此事仍十分氣憤，更說她試穿完該店的婚紗後皮膚敏感、花費了過萬元睇皮膚專科。結婚碰著黑店，怎知道她卻「因禍得福」：倒霉經歷成了她創業、開設「慧子婚紗」的契機。
「當時我和先生添置了許多結婚用品，多到甚至塞滿了我家的儲物室，但結婚之後又不捨得隨手棄置，於是我開始將這些用品義借給街坊朋友。直至2020年暑假，得到正職通知我不再續約，想了一想，既然我咁鍾意婚紗、化妝呢類靚嘢，便索性將婚紗出租當成副業。」於是 Maggie 開始四出採購搜羅婚紗、禮服，花費至少五、六十萬，半個月後「慧子婚紗」正式開業，提供婚紗、男女裝禮服等租借服務。
自言由細到大都好貪靚的 Maggie 把開設婚紗店視為興趣，她認為能為準新娘化妝、推薦婚紗，是一件治癒紓壓的樂事，所以在店舖開業不久，便到化妝學校修習化妝與美甲，務求給準新娘一個盡善盡美的體驗。與此同時，她亦設立了婚紗義租服務，真正有經濟困難的社會基層只要解釋清楚自己的情況或出示經濟證明，例如綜援或關愛基金文件等，只需付清潔費，便可借用婚紗。 Maggie 更不時與非牟利機構合作，為長者補拍結婚照，並提供婚紗與化妝服務，開店至今義務借出及捐贈的婚紗禮服等合共超過2,000多件。
親朋力撐 義租服務蝕住做
「其實我爸爸媽媽好唔支持我開婚紗店，佢哋話『正正經經打份工好過，搞咁多嘢做乜』，但我爺爺的遺願是希望我創業做生意，我嬤嬤亦十分支持，加上當時做義租，許多街坊主動送出自己的結婚用品放在我的店內義租，或者問我需唔需要人幫老人家化妝之類，有好多支持。」在嬤嬤與街坊的鼎力相助下，Maggie 選擇堅持義租服務，高峰期甚至有幾百個未讀的申請，義租與一般租用借達 8:2 的不平衡比例。雖然小店幾乎長期處於虧損狀態，但對她來說，客人一句感謝說話遠比賺錢來得更有價值。
見盡貪心香港人 被Sell自己捐出的婚紗
可惜 Maggie 的善心卻被某些人利用來「搵著數」：「我初頭嘅心態係：『我擺喺到都冇用啦，你鍾意點就點』，但是我慢慢發現有些人的貪念是無窮無盡的：曾經試過有人明言自己無經濟困難，僅僅因為男方想返大陸『大搞』婚禮，她純粹想慳得就慳，結果她Send了婚紗、晚裝、裙褂、首飾等一大堆用品的列表給我，睇到我呆咗；亦有人免費在我這裡借衫，結果高價轉租畀人……所以我現在亦提高了義租的門檻，就算不出示任何文件，至少也要寫信給我說明狀況，而唔係話『你邊啲最貴嘅，攞晒出嚟，我要免費借』咁樣。」
Maggie慨嘆開業一年多，她總結出一個大約的數字：「100個義租申請裡面，可能只有一個真正有需要的人。」
但上述事件還未算最誇張，在2011年11月曾有一位新婚人妻打算向她出售二手婚紗，聲稱婚紗原價$1,250，現以幸福傳承意頭價$1,288轉售予「慧子婚紗」，更話「怕賣結婚用品意頭唔好」，向 Maggie 提出 「最好到時封多封利是畀我哋會好啲」。 Maggie 甫收到訊息已深感不解，細心一看竟發現這件婚紗是她以前在Facebook新娘群組免費捐出的婚紗：「我覺得好奇怪，嗰陣佢拎我啲嘢話用完會送返畀有需要嘅人，但最後竟然走嚟貴過原價咁賣返畀我，不單止用我當初 Share 出嚟嗰張相，仲問我攞利是，成件事好無稽。其實佢著上身我都可能認唔到，但佢懶到直接用我幅圖。」於是 Maggie 以《奇文共賞》為題，將這件叫人啼笑皆非的「趣事」分享到 Facebook 專頁，當時帖文引起網絡轟動，有超過6,000人讚好、千多人轉載。此事在外人看來確實可笑，事實上 Maggie 每日面對種種渾水摸魚的行為，一度讓她心灰意冷，更嘗試在2022年頭終止公開義租服務，只限NGO申請，以免服務被人濫用。
因心軟重開義租 推「重生婚紗」助弱勢
「我有時對香港人好失望，每次都好嬲，但係嬲完見到香港宜家咁嘅時勢，唉……我又心軟，又出返嚟做義租。」 Maggie 表示由於見到許多準新人受第五波疫情的防疫措施影響，導致財政出現困難，加上市面有部份婚紗店收款後臨時結業，令他們無所適從，連找一套合適的婚紗去註冊都有問題。於是她毅然「重出江湖」，在兩星期前宣佈重新開放義租服務，提供經典或簡約款式為主的婚紗予將於2022年年頭辦婚姻註冊的準新人當天使用，名額約為300個（暫時4月20日截止）。但她這次一再重申：義租以先到先得形式進行、每人只限租借一件，每日最多借予5對準新人，申請時需要出示經濟及結婚證明，實行將資源留給有需要的人。
雖然公開義租曾一度暫停，但 Maggie 從未停至默默付出：「上年12月有個從事布藝的街坊移民，卻帶不走剩餘的婚紗晚裝配件、蕾絲及布料，而我以前做義工時結識了多位修讀 Fashion Design 的大學生，適逢他們要交功課、舖頭又有些本來就需要維修的婚紗，我便提出可以利用這些婚紗與配件縫出他們的作品。」後來見成品不俗，同學們亦交完功課， Maggie 便順勢將5件由準時裝設計師親手改造的「重生婚紗」撥入義租清單，同樣只收清潔費，「由於這幾套『重生婚紗』可以濕洗，所以相比租借一般婚紗的費用要低至少$1,000至3,000，大概只需要$500清潔費，但仍然會有人提出問可否分期付款，亦有人租了婚紗後需要另外上網徵求其餘結婚用品。」Maggie 提起以往接觸的基層，深深地嘆一口氣。
「我起初都有諗『下！點解你租完之後，解決唔到清潔呢個問題』，咁我同嬤嬤分享，佢就話『係呀，好慘㗎呢排。疫情啲人都唔知可以點，有能力幫到就幫啦』」於是 Maggie 的嬤嬤坐言起行，開始搜集洗衣材料、落手落腳清洗部份義租後的婚紗，務求減輕「慧子婚紗」的洗衣成本。看著為支援弱勢社群不遺餘力的嬤嬤， Maggie 彷彿亦重拾起當初開店時的勇氣，決定咬緊牙關，在疫情中重開義租服務。
「其實有時見到都好心噏，講真有邊個女人唔想自己風風光光咁出嫁㗎……」
移民客捐贈物資 祝福「留下來的人」
面對今時今日前況未明的香港，願意繼續留在本地結婚生子、開枝散葉無疑是一種勇氣，而 Maggie 卻認為移民客人的「祝福」更讓她動容：「好多移民客其實好客氣，就算佢哋真係因為準備移民而使錢多咗，都會再三咁講『你千祈唔好平畀我，你要加油呀！你好唔容易！但係你唔好再畀人搵笨，唔好再畀人恰啦』，畀咗我好多鼓勵。」Maggie 分享，甚至有不少客人在移民前，特意將結婚時用過的物資親手送來店舖，
「佢哋成日話『我哋帶唔走呢啲，有相片嘅回憶已經好足夠，你幫我畀啲有需要嘅人，我信得過你！』，這些結婚用品就似是他們對『留下來的人』的另一種祝福。」
「每個人對結婚生子都有不同的睇法，好老實講我當初開設婚紗舖係純粹因為我鍾意靚衫，我覺得『你結婚緊係揀最靚嗰日、著最靚嘅衫』，結婚呢件事本來就冇對錯之分，最緊要係忠於自己，要為自己接下來的事負責，因為人生係屬於你而並非他人。」Maggie 又輕笑道：「其實邊個唔想生意好呀，但係宜家香港個環境實在太多變數，不過我會同自己講，只要一日仲有能力，我就會盡力幫得就幫，只要啲人唔係貪心濫用就得啦。」 Maggie 接而將手機遞過來，展示出一頁遮蓋著聯絡資訊的對話紀錄，粗粗略過，只見「情侶」、「上庭」、「簽紙」、「婚紗」幾組關鍵字，當中一切緣由卻盡在不言中……
【慧子婚紗】
地址：屯門新平街2號屯門工業中心E座10樓E3D舖（只限預約，不設Walk-in）
營業時間：10am – 6:30pm
聯絡電話：6974 6779
Facebook：慧子婚紗 Mrs. Tse Bridal
Instagram：@mrs.tse.bridal_official
