我居然都中咗Omicron！瀨咗嘢！（不過一街都係已經好平常了？）
先聲明一路唔講係因為我真係瞓好多，冇嘢俾休息更重要，瞓到好似入咗時間艙咁，出返嚟個天已經有飛碟周圍飛嗰種不分日夜同年代去瞓。其次就係對住個世界冇咩想講，已經搞成咁仲有咩好講😂所以有精神先整理下感想，每日活動量好少。
講到好似中六合彩咁，我心𥚃面已經有咗呢個預感，我冇可能坐响度乜都冇經歷但去叫人冷靜啲、放鬆啲，自己冇經過苦難嗰啲人就唔好出嚟講呢講路嘞。但而家我可以😂啋！
講返基礎資料：
🌻冇打過針
🌻選擇用中藥
🌻冇食過panadol
🌻有調頻TimeWaver
🌻病徵算明顯同好大幅度上落
我比較認真對待每款病徵，有人覺得我好似好誇張，但喉嚨痛我唔會三隻字講完，我會以程度去評分，方便中醫理解狀況。
Stage 1.【發冷、高燒】
我有病徵嗰一下係由零去到五十咁明顯，我不嬲留意自己身體，嗰個傍晚突然覺得啲骨好散，少少頭痛。本來諗住响街行多半小時順便車我老豆返屋企，但突然間覺得，唔係喎，呢排我已經冇返屋企食飯、又冇見薯仔，呢刻無啦啦車佢，一陣有事咪仆街。所以都係叫佢自己返屋企。真係好好彩。
晚上就精彩啦，好醒目十一點鐘上床瞓，跟住嚴重發冷，最正係房有暖風機，但凍到傻咗冇伸手去開機。發冷四小時轉為發高燒，當時未有探熱針，估計都好高溫，有諗過會唔會因此燒到變蠢。全身好痛，典型重感冒會有嘅皮膚、頭皮赤痛，非常之敏感地痛。又有另一個好彩係我買咗TimeWaver Home，突然間醒起，爬出房攞咗即刻run下frequency ，我想瞓得到咋唔係要即刻康復。好不容易捱到天光。
打俾中醫斷症。因為我知道發燒係有功能，所以冇打算迫自己即刻要退燒（詳情請看【工作細胞：流行性感冒】）攞到探熱針之後，體溫徘徊38.5左右。我中醫已經做咗好多case經驗豐富，個病啲起起落落大家大同小異。印象中人生有幾次重感冒都係咁辛苦。呢日冇記憶，冇食過嘢亦冇興趣、冇需要食。全日响張床度，冇沖涼冇洗面冇郁過。長期接力用TimeWaver Home以及用醫療級吸氫氣機，有效快速放鬆瞓覺同埋減低嗰種感冒式頭痛。
Stage 2.【發燒、冇胃口】
繼續低燒，頭痛、周身骨痛、皮膚痛。味覺得返苦味，但由於苦茶都好苦所以冇分別。唯一係好想食士多啤梨🍓！仲有檸檬、橙等等，唔知點解。老母買來了熊本縣士多啤梨，我屋企有煉奶。味覺上係有層苦，但依然好味。一盤分兩次食（全日只係食咗呢個）夜晚突然有精神去沖涼好開心。
Stage 3.【發燒、退燒、低燒、喉嚨痛】
一瞓醒全身汗，喉嚨超級痛。退燒就出到汗。但亦因為退燒，我都估到今日快速測試應該顯示positive（個個都係咁講）連日嚟成日俾人追問檢測結果，我覺得大家唔好迷戀一個檢測答案。有病嘅人要自己坦白面對身體有唔妥，而唔係望住一條線兩條線嚟決定做乜。仲有。就算你positive，醫生都係斷症下藥（in my case it’s 中醫）點發熱、點發冷、點痛，全部都有關，但同你「被法定乜乜機構話你陽性定陰性」無關。Come on，醫病係醫個人唔係醫兩條線。
不過仲有人夠膽叫我出街檢測。我喎！燒緊啦喎！行走中的Omicron啦喎！仲出街？自問冇力揸車，即係走去坐車？咁我點確保我冇傳染俾人嘅危險？去到呢度我覺得呢個病贏係贏在個腦。輸？輸在冇人肯用下腦。但我知，好多公司要求員工有官方證明確診先會唔扣假之類，搞到人人急住出街抵住病要排隊檢測，否則又話你曠工，呢啲公司、呢啲話事人，同香港一樣！病到忽咗！醒未呀大家！
我亦都知道好多人唔留屋企係驚搞到屋企人。其實要互相幫助、互相教育，知道「病毒」係一個咩概念。另外我又諗，如果你要强檢感冒，香港長期有大量人口處於感冒狀態㗎，呢刻我甚至反省點解要歌頌「病都返工」嘅同事？每種感冒都係病毒嚟，有病應該好返先出街係常識。原來係常識。病毒同細菌係兩件事，唔知到今日有幾多人分得清呢😌
Stage 4.【好多痰、喉嚨痛】
依然喉嚨痛得好緊要！！！
平時重感冒喉嚨痛係火燒感覺，但Omicron嘅喉嚨痛係你喉嚨俾𠝹刀𠝹傷咗咁痛，每吞一次口水就翻𠝹一次。係刀傷鋒利劇痛。
終於有想食嘢嘅衝動，但只係衝動，因為好易攰。因為病毒品性濕寒，萬萬不能亂食嘢。例如餃子如果係白菜豬肉，有白菜死梗。我媽居然揾到韓國青瓜豬肉餃。但好難食🥲所以我都係煮快熟通心粉。下午又係瞓覺，嗰種一挨落床舒服即刻飄走嘅感覺相當良好。
半夢半醒之間我問Omicron其實你邊度嚟㗎？畫面係洛杉磯Santa Monica山火，我再問，呢個夜晚山火畫面係L.A.定澳洲？答案都係L.A.。莫名悲傷感覺，一定係本來有好多嘢住咗响自己棲息地，你冇燒到人渣都冇，佢唔使轉移或變種。蝴蝶效應不難理解吧。瞓醒覺再查下L.A.山火啲資料，諗起無數樹林、動物避無可避，樹林係地球個肺嚟㗎喎。唔好問點解嗰邊山火呢邊疫情，地球係一個波，任何人做任何嘢都係集體意識一部份，要你食返啲都冇計。
Stage 5.【好多痰、咳】
暫時仲有病徵所以尚且唔浪費快速測試套裝。有胃口但不見得有咩想食。我中醫話佢有同行响博覽館幫手但中招，中咗之後，作為中醫冇得揀用返中藥(?!)然後食飯係派咖喱雞或牛（??!!!）呢啲又多汁、辣、油淋淋嘅食物食到所有人咳到仆街又久病不好。我想知邊個高手負責安排呢啲嘢，有冇少少良心？病人喎？新冠喎？食咖喱？再一次感受到醫呢個病係用智慧，唔好講其他嘢。
我趁有精神消毒咗屋企，我知暫時消完毒又會俾本人污染。但我feel better抹乾淨啲嘢一次。然後又上床休息🌚兩邊鼻都全塞，咳到傻咗，用咗TimeWaver “breath of life”，即刻呼吸到同埋個人放鬆返，冇再咳，瞓到覺。
咳嘅時候我諗，wow Omicron我估你一定係想我狂咳嚟到傳染俾更多人！但！呢個空間得我咋！我會射晒你出嚟！然後傳染唔到任何人！哈哈哈哈！哈哈哈哈！咳、咳咳⋯⋯
應付Omicron需要嘅係冷靜，
停止獵巫、Focus on自己同身邊人，
唔一定要食好多嘢、聆聽自己需要，
瞓覺、瞓覺、瞓覺、
熱檸檬水，
維他命B/C/D/Zinc
呢種天氣身心都難受，希望所有人同動物都可以保持温暖而乾爽。
雜項照片：
【橙】
我終於明啲人點解係屋企掛一袋二袋，例如啲橙咁樣，成袋掛上去嘅原因係因為你已經放棄咗生命，你有比呢件事更重要嘅事，你就唔會理好唔好睇😂
【平價牙刷】
大病期間要經常替換牙刷是常識。
【腫瘤噴壼】
叫我媽買個噴壼俾我溝漂白水😂呢個嘢，頂你個肺，個設計師應該懶威咁「用紫色嚟做個壼，不如就設計到成抽提子🍇咁吖！」邊個需要你响呢個位扮水果！it’s so ugly 😂😂😂😂
繼續做隱士專心養好身體係本月重點，因為我每次重病喉嚨都好弱會咳好耐，咳就講唔到嘢，所以暫時有咩都係會叫暫停先。大家都要保重身體啊啊啊。
（如果想留言俾我，我請求動用呢一個留言quota嚟祝福地球，要好的話所有樹林動物一齊好，唔係得人類獨善其身。）
未必回覆大家，呢幾日瞓出一個狗窩來，超舒服，而家我又返入去了，see you soon！
