王喜踩入大渣哥｜煎皮拆骨講真話

近月曝光率甚高的王喜，言行舉止總帶著直率的氣場；不造作、不虛偽，正是大家喜歡「忠勇毅」的原因之一。這天他走入好友譚小環老公開的「大渣哥茶記」，滿以為他會分享自己喜愛茶餐廳的二三事，想不到他把茶餐廳文化煎皮拆骨，對黃色經濟圈也有另一番解讀。王喜不屑茶記文化，卻對大渣哥寵愛有加，是否自相矛盾？王喜則說：「大渣哥係昇華咗嘅茶餐廳」、「渣哥份人線上線下都咁真」

渣哥講人話，王喜講真話，難怪惺惺相惜。在「真話」快要絕種的年代，哪怕真話、人話不似預期，只要言之有物，也比滿街的謊言廢話值得細味。

文：聽葡
圖：史角、大渣哥fb

沒有愛只有互相傷害

王喜對茶餐廳沒有感情，認為這不過是生活中的一部分，沒有甚麼不可或缺的，「茶餐廳餐牌有一百幾廿個選擇，無非係話你知佢唔能夠、唔想『被要求』，我就係得咁多嘢⋯⋯味道見仁見智，總之價錢平，你飽咪算囉！」

但茶餐廳的速度，算是配合香港人節奏，造福打工仔吧？

「如果我們保持對飲食有要求，真真正正有一小時食飯休息嘅話，喺客人入嚟時，奉茶、遞毛巾、畀menu，噓寒問暖，客人可以唔使滾水淥腳咁走，咁仲邊會有茶餐廳？正正因為僱主對員工唔太友善，而員工又要把握食飯嗰一個鐘頭食飯又要做其他野（交費、去銀行等），咪唔顧自己身勢，求祈扒兩啖，到最終我咪喺嗰一百幾廿個選擇中，揀午餐卡紙嗰五個選擇。」

經營良心店難過做家嫂

茶餐廳跟食客，在他眼中是一段互相傷害的關係；即使餐前體面的奉上飄香鍚蘭紅茶，食客卻對食具衞生心生疑慮，把餐具泡在其中，彼此間都失去禮儀和尊重。

茶記飲食文化在阿喜口中如此不濟，但講理念呢? 一場社會運動，人或店舖都把自己上色（或被上色），一旦冠上良心黃店標籤，路不見得更好走。王喜肉緊的說「仲難過做家嫂呀！」要維持良心很難，塑造「良心」的標準因人而異，不論你是否在營業時間，也得保持那顆良心。同時良心建基於業主而非店主，租金跟良心成反比。太浪漫化令我們愈走愈遠、愈跌愈痛。「你一定要體諒佢有冇條件同空間表達良心，當有日佢停止或減低呢個表露良心嘅分量，你有冇呢份容忍？」

四月初，香港眾志全球搜尋口罩，渣哥幫手派給老人家，爽爽快快無賺錢之嫌。（大渣哥fb圖片）

黃藍是色盲味道自己知

由上世紀《闔府統請》的廚師角色「OK德」，到阿喜Facebook（現已刪除）煮食分享，即使沒有XX廚神的加持，王喜應該對食有要求有心得⋯⋯啩？不過傳說中的「黃藍是政見，好食是良知」，王喜卻不以為然，因為「黃藍」在他眼中不叫政見，而僅僅是一種「Colour Blind」（色盲），互相無視對方手中的資訊和理據。

至於「好食是良知」，王喜自己也不太在乎。「黃色經濟圈係股衝動，情感嘅顯現嚟，唔係食神駕到吖嘛⋯⋯應該咁講，你起碼要煮熟畀大家食囉！熟、乾淨、食完唔會肚痛，咪得囉﹗大家係因為條氣唔順，喺條街度，被不公平、不合法對待，又無法宣洩，於是乎⋯⋯係唔好食呀！我偏要去食呀，銀包喺我度。」

王喜也曾經吃過難吃的告急黃店，吃罷結帳不必對方找續，正是「目標為本」，就是要給你實在支持，讓同路人經營下去，而不是放到網上口誅筆伐；當批判者容易，體諒別人的限制，也是一種修為。

黃色經濟圈人人可受惠

黃藍雖是不同理念，但社會總是一體，王喜認為即使多黃的老闆，也要找不同的供應商入貨、供樓、為兒子交學費，無可避免地部分開支也可能流向了藍營。所以因「理念感召」而形成的黃色經濟圈，始終也有利益回歸社會，反而帶動了整體經濟。

「關乜嘢黃唔黃、藍唔藍⋯⋯咩事啫，呢個只係一個理念嘅感召。情況同捐血一樣，你係唔buy捐血救人，你就唔會走去捐血。但你唔buy呢個理念，你有需要嘅時候，依然可以享受到血液製成品⋯⋯咁呢班唔相信捐血救人，但又同時可以享受輸血服務嘅人，係咪無恥呀？唔係，係個體制結構令佢哋享受到呢個benefit。」

因此，王喜認為即使有人不認同黃色經濟圈理念，只要是社會的一份子，到最後也可以在當中獲利，而彼此也有共同的利益需要去照顧。「黃色經濟圈邊有任何政治嘅危害呢？佢反而係secure咗一部分經濟命脈。起碼有一班黃店可以繼續經營，唔使裁員。至於藍呀、綠呀、啡呀⋯⋯你咪用你自己嘅方法去繼續掙扎求存囉。」

大渣哥開幕時，得到同路人客串店小二，例如邀得人氣甚高的譚文豪議員支持。（大渣哥fb圖片）

念念不忘渣哥必殺技

大渣哥是公認的「黃店」代表之一，自年初開張以來食客不絕，人氣持續高企。但如此受歡迎不僅是因為小環與渣哥甚得民心，一如王喜形容：「大渣哥是昇華了的茶餐廳」。

比起一般茶餐廳，大渣哥給人一種衞生、舒適和新派的感覺，然而王喜用到「昇華」二字，必定有更深層意義：「可以令一個港姐同你去賣魚蛋喎！呢個係一個謎一樣嘅男人嚟喎！」一個閃閃發光的港姐，收起后冠，告別追求者森林，在那盤香辣滾燙的咖哩魚蛋汁中夫唱婦隨，除了喜愛食魚蛋燒賣，就真的是真愛吧！

大渣哥茶記總管Alex Tang透露「開茶記」是渣哥的兒時夢想：「茶餐廳貼地又地道，早午晚三餐都可隨意嚟幫襯。

王喜口中「謎一樣」的男人，不論在線上線下皆言行一致，「戒急用忍」更令阿喜視之為學習榜樣。渣哥的facebook專頁，總是么心么肺講人話，學某藍絲所講，打開門口「食四方飯」，偏偏這位黃到金的老闆專講人話，偶爾霸氣盡露，但幽默的主意更多，既是真心表白，也是成功的marketing，總是叫網友、食客一看難忘。笑笑口的阿喜裝出感性腔：「一段戀愛最失敗嘅係，你唔記得咗佢」。

大渣哥短短時間內深入民心，必定多得他們在社交媒體、餐牌設計⋯⋯到防疫板上幽默啜核的文字，大渣哥茶記總管Alex Tang指這全是團隊的集體創作。「老闆本身都好幽默風趣，呢啲都係由佢率領團隊創作嘅，想感覺親民親切啲，大家好似返到屋企咁。」