旺角小店雞蛋屋的員工自開業以來，堅持以應援、寄賣等方式與年輕人同行，半年前營運班底被逼解散，一眾員工只好另覓工作。近期蛋蛋班底宣佈與友店後生仔海南雞合租西九龍舖位，一來以免友店因人手不足而停業的舖位日日白交租，二來亦希望以Egg Soldier之名捲土重來，用一條龍外賣團購及度身訂造到會餐單，重振無懼高牆的「雞蛋精神」。

文：Layne
圖：受訪者提供

雞蛋兵辦團購 貫徹良心理念

目前Egg Soldier以日租方式租用後生仔西九龍舖位，只做外賣團購，不設堂食。即將出發的團購共有13團（送貨日由13/5至8/6），涵蓋沙田、太古、馬灣及九龍城等地區。雖然負責人表示回歸之初，出品未必太花巧，但每次團購都會加入新菜，例如今日9pm截單的烏溪沙、馬鞍山團就有假肥排骨飯（瘦排骨飯）、香港腳（雞腳）、涼拌辣魷魚及靚仔牛肉飯等菜式（每款價錢由$28起），「唔望賺大錢，只求可以繼續實行理念」。

飯聚必試 度身訂造到會餐單

此外，小店亦設有到會服務（無固定餐單），客人可按需要與負責人商量Menu，包含鰻魚炒飯、炸虎蝦蛋卷、金沙骨等10人份量菜式的到會，價錢為$2,000，有聚會不妨試下。大家貪快想到西九龍舖位自取的話，亦可選擇在團購截單前DM專頁落單。「雞蛋」之所以能堅韌不碎，全因有一道信念支撐，大家一於齊齊幫襯團購，與蛋蛋們共同進退。

【Egg Soldier團購】

送貨日期：5月13日至6月8日
自取地址：深水埗西九龍中心8樓 後生仔海南雞舖
詳情：bit.ly/3vYEdPz
Facebook：Egg Soldier
Instagram：@egg_soldier_hkers