港島餃控有福了🥟｜餃里衝出屯門炮台山開店

入選foodie界四大餃店嘅屯門餃里，以實的的餃子闖出名堂，佢嘅生餃港九新界都有售賣點，除咗韭菜餃、芫荽餃之外仲有少見嘅泡菜餃、紫菜餃、和風椰菜咖喱餃同素餃，不過要食新鮮包起嘅餃子，以前要入屯門碼頭先食到，但最近佢哋喺炮台山開咗新分店喇！

文、圖：siu（Shot on iPhone 14 Pro）

餃里即包即煎手工餃子

新店位於富利來附近，本身都多同路人小店，餃里新店跟屯門一樣只做外賣無堂食，雖然店面只得百零呎，但餃子都是即場包製即煮即食，上星期到訪時為lunch time 一點半左右，餃子控已經慕名排滿店外取餃，人氣十足，眼見店內一排四五人密密手包餃煮餃，柯打後要等20分鐘左右先出餃，如果放飯想食餃子記得提早WhatsApp落單！

餃里每日提供6款湯餃 + 10款煎餃，可選6隻或9隻，想一次食多款可以自由雙拼或三拼，另外還可配成上海麵餐或加配撈麵。煎餃口味比湯餃多，招牌芝士粟米、泡菜、咖喱及和風椰菜咖喱只設煎餃，不過湯餃則可以選椰子豬骨雞湯、無花果栗子腰果素湯或者番茄薯仔肉碎湯，湯頭足料冬天夠暖胃，食煎餃還是湯餃好？實在令人心大心細！不過唔好錯過仲有餃里嘅菜甫，粒粒辣勁十足，用來撈麵最正。