深水埗兩間小店攜手走更遠｜一間食齊西式小食+海南雞飯

最近屢有傳出小店經營困難、結業的消息，令人感到可惜。在逆市下，西九龍中心美食廣場兩間小店：主打西餐和輕食的蕃廚、主打正宗泰式海南雞的後生仔海南雞，就選擇攜手共度時艱。上年後生仔海南雞旺角店結業後，只剩下西九龍分店，最近搬至蕃廚舖位，兩店在一個舖位共同製作好西畀大家。記者就推薦兩個私家組合，等大家可以一次過試哂兩間！

深水埗美食,西九龍中心,後生仔海南雞,蕃廚,小店,合作,西式小食,海南雞飯 — 琳琅滿目的菜單，睇落樣樣都好吸引！

組合一是大食之選，主食可以試試後生仔的招牌海南雞飯（$50），雞件幼滑且量多，配上豬油拌飯加入甜豉油，頂層鋪上豬油渣，偶爾食得「邪惡」少少，就當慰勞一下自己。再加上蕃廚的蝦多士（$30），面頭灑滿白芝麻夠晒香口，預先切開4份同畀你同朋友開心share，或者獨食碳水炸彈組合亦冇問題。

組合二是辣味之選，先食個蕃廚辣茄醬薯格（$25），薯格上的粒粒番茄醬有微酸辣感，先開開胃，再食後生仔的麻辣海南雞飯（$53），海南雞面頭上的麻辣汁帶微辣，但麻感十足，油飯加入黃薑製成，非常入味。加上購買任何後生仔的海南雞飯，都會附送一枝純茶，咁食辣BB班都唔駛怕。而購買兩間小店的任何食品，亦會隨餐附上一小盒啫喱，食埋飯後甜品夠晒滿足。