「想做就去做，最緊要開心。」是人氣蛋糕店Buy Me Cakes店主Rachel 給有夢想的人一句至理名言，話雖如此卻未必人人能像Rachel一樣說到做到。她大學畢業後便著手經營網店，售賣自製韓式復古蛋糕，憑着款式獨特、配色講究，開業第2年就已在觀塘開設實體店，現時IG更累積近3萬粉絲，不過小店早前宣佈將於6月結業，Rachel縱使萬般不捨，但也一如當初創業般果斷：「暫時離開香港照顧好自己心情先。」
想當初從沒學過烘焙及畫畫的她，只因「大學時期已幻想開一間好靚嘅店，有蛋糕有咖啡。」於是畢業後日以繼夜練習，努力實現夢想。3年後Rachel夢想成真，蛋糕店已得到不少顧客肯定，但她自覺經驗仍不足，需要增值各方面的能力才可令夢想更完整實踐，所以坦言這次離開「不是結束，而是一個過程」。想不到年紀尚輕的Rachel已擁有一套豐富的人生觀，令人更好奇她如何在零經驗下經營一間蛋糕店，並透過蛋糕看世界。
文：陳粒
圖：陳粒、店舖提供
實現夢想一切由「試」開始
「試，咩都要試！蛋糕店都係試返嚟。」熱愛韓流文化的Rachel早在求學時期已喜歡韓式復古蛋糕，一次旅行中發現一間令她一見鍾情的蛋糕店。畢業後正準備投身社會卻遇上突如其來的空窗期，無聊之下嘗試整蛋糕「開頭只係整畀屋企人食，佢哋話味道唔錯，但零手藝加上手震令蛋糕上嘅手寫字好核突。」自問沒有學過烘焙及畫畫的她，每日花大量時間上網自學，練習唧花技巧至深夜，令她回想一路走來的心情：「開頭只係抱住一路做一路試嘅心態，要好多謝客人一路上嘅支持，令自己可以繼續進步。」
打破網店蛋糕好睇唔好食傳說
要做到蛋糕好睇又好食的確唔容易。起初由接單、與客人溝通、配色、設計圖案等工序都由Rachel一手包辦。要減少蛋糕製成品與客人想像的誤差，Rachel會將客人提供的圖用ipad配色後再襯色，做好每一步溝通才動手唧花裝飾，不惜花上大量時間，為的只是做好每一個客製化蛋糕。Rachel深知自己由細到大都係3分鐘熱度：「但只要你夠鍾意，係會不斷求進步，開店初期整蛋糕為開心，而家認識到一班客人，會因為佢地而希望自己愈做愈好。」蛋糕訂單急增，小店亦增添小幫手，令Rachel可以更專注練習唧花畫圖技巧及研發蛋糕口味，其中華田香蕉味的創作靈感來自她細個食香蕉時，鍾意撒啲華田粉一齊食。
整蛋糕以外的挑戰
整得一手好餅之餘亦要處理蛋糕店的大小事務，不論人事管理、店舖宣傳等都令她感到吃力，自知時間管理方面比較弱，每晚做到凌晨才離開餅房，但亦不減她把握機會開班教整蛋糕及參加市集。「雖然擺市集冇錢賺，亦比平時整餅辛苦，要趕起好多貨，又要搬雪櫃出去，但都係一個整蛋糕以外嘅體驗，仲可以認識到一班好熱情嘅客，係一個好奇妙嘅連結。」
日瞓只有數小時的她還會設計一系列復古風貼紙、鎖匙扣等周邊商品，希望令Buy Me Cakes更完整。「我想Buy Me Cakes係一個個性化形象，有不同商品令品牌無處不在，唔係只賣蛋糕，食完就唔記得。」
活在當下忠於自己
問道現在蛋糕店擁有一定人氣及口啤，貿然結業會否可惜？Rachel坦言經歷多番掙扎才有這決定：「屋企人成日都話我靠符籙，做嘢唔諗後果。」然後又豁然開朗說：「最緊要忠於自己！工作上嘅夢想係整蛋糕，但人生上嘅夢想可能係去遊歷，人生好長，夢想唔止得一個。當你踏出第一步，自然會有路畀你行，話唔定我出走完又會返嚟開Buy Me Cakes 2.0呢，邊個知？」能夠擁有活在當下，及時行樂的Rachel希望每一個食過Buy Me Cakes蛋糕的客人都能夠抱着敢於嘗試的精神實現夢想，好好記住曾經擁有的人和事，我哋亦期待不久將來能夠再食到Buy Me Cakes的味道。
【Buy Me Cakes】
地址：觀塘開源道55號開聯工業中心A座9樓904室
結業日期：6月4日（請留意店家的最新公佈）
Whatsapp查詢：6414 2467
IG：@buymecakes
