過去三年疫情下的香港，突然冒起很多Omakase廚師發辦高級餐廳，但係食一餐閒閒地都要幾嚿水至數千元先落到樓。不過最近尖沙咀就有一間話題性十足的小食店「餓媽家姐」，最低消費只需$10就有交易。店名大玩食字諧音，雖然不是提供真Omakase，但憑着超過60款港日小食及多款新派小食、在食店林立的厚福街突圍而出。店名不僅令人會心微笑，食物也誠意十足，皆因是由曾經在葵廣打滾三年的「邦爺漢堡」創辦人邦爺連人帶食譜到新店主理，剛開張時推出的粉紅脆香單骨雞翼更曾經掀起一輪打卡熱，希望憑創意及經驗進佔尖咀食街爭一席位。
文：陳粒
圖：陳粒、店舖提供
憑創意小食闖進厚福街
「餓媽家姐」今年7月開業，以一味「粉紅脆香單骨雞翼」食正電影《Barbie》熱潮搶佔話題。小店背後沒有財鴻勢大的宣傳人員，但食物由曾在葵廣經營食肆的邦爺主理，加上識得在網上創造話題的呀浩，即使呀浩過往沒有餐飲經驗，只是一心想開港式地道小食店，結果一拍即合，為「餓媽家姐」開了個好的勢頭。開店以來，餐牌已有超過60款菜式，猶如一個美食廣場的濃縮版，每幾個禮拜就推陳出新，除了招牌的燒賣魚旦、田園沙律、日式炸物、便當烏冬之外，最近更研發出3款創意料理，包括14款口味醬汁炸燒賣及川味牛肉炒腸粉，當然唔少得邦爺馳名的手工漢堡，更預告將有復刻口味登場！
小店剛開業時推出便大受歡迎，因當時正值《Barbie》電影在港上映，顏色搶眼，不少人慕名而來打卡。芭比粉色醬汁用火龍果製作而成，顏色純天然，無添加人造色素，味道酸甜開胃。
話題① 14款醬汁拌炸燒賣
小店除了蒸魚肉燒賣外，還有炸燒賣深得港人喜歡，近日更推出14款醬汁選擇，包括明太子、黑松露醬、蒜香蛋黃醬、美式辣醬等，而顏色搶眼的粉紅甜酸醬汁也佔一席位，與炸燒賣落鑊一齊兜！除了以上醬汁，店主還力推拉絲芝士別注版，想知拉絲有幾長？有待大家親身品嚐啦！
醬汁不是額外給你蘸的，而是和炸燒賣落鑊一齊「兜」。
話題② 川味牛肉炒腸粉
如果你覺得燒賣魚旦等小食只是攝牙罅，不妨試試有5款口味的炒腸粉系列，包括XO醬蛋炒腸粉、日式鰻魚炒腸、韓式泡菜炒腸粉等。採訪當日邦爺正研發新口味「川辣牛肉炒腸粉」，邦爺指腸粉是採用本地品牌，夠香又軟滑，加入韮菜、乾蔥、青瓜等配料，混以自家調配的辣汁一起爆炒。記者試食後認為辣味溫和又開胃，鑊氣十足而且牛肉不乾身；腸粉面頭灑上的芝麻，令整體香味提升，非常值得一試！追問這款新腸粉何時推出，邦爺笑言：「快啦快啦！」，有望月尾推出，想食嘅朋友要密切留意啦！
腸粉份量頗多，建議與朋友開心share。
話題③ All Day 手工漢堡
小店由做開漢堡的邦爺主理，當然唔少得不少人專程來棒場的手工漢堡，主要分了安格斯牛及黑毛豬兩大派。邦爺堅持用人手打肉做漢堡扒，使用無激素的純優質安格斯牛和有機黑毛豬，自家調配醬料等新鮮食材。較受歡迎的是經典芝士安格斯牛堡，而邦爺亦透露舊時在葵廣大受歡迎的「All Day漢堡」亦將會在年底前復刻登場。
漢堡包含全日早餐的薯餅、煙肉、太陽蛋等6種邪惡配料一拼夾在包內。
憑漢堡包在葵廣三年磨一劍
「餓媽家姐」店面細小，廚房也只能容納2-3個身位。本以為要製作出這麼多款菜式應該需要很多人手吧，但豈料全由邦爺一手包辦。邦爺十多歲便開始打工並兼職做廚師，在30多歲正式全職投入廚師行業，曾擔任酒店、茶餐廳及大牌檔等不同食肆的廚師，幾乎高低檔次菜式都煮過，就連凍肉舖及菜欄都做過，對食物質素要求非常高，而且餐飲經驗豐富，但為何會選擇以速食之一的漢堡包展開創業旅程？原來一切都是疫情下的生活迫人所致，邦爺曾想過舉家移民，或揸貨Van送貨，不過幸運地在邦嫂及朋友的支持鼓勵下選擇了開小食店。
自小喜歡下廚的邦爺對開食店一頭霧水，還在憑空想像的時侯，一次與邦嫂和朋友們野餐需要準備食物，在眾多食物中朋友們對邦爺自製的漢堡包讚不絕口，從而激發了他們開漢堡店。最後選址葵廣邊試邊做外賣店，亦成為了當時商場內的獨市。憑着邦爺對食材供應的熟悉，多年的廚師經驗，以及對食材的執着，開業三年已獲得好口碑。而葵廣店租約剛在今年7月期滿，又在機緣巧合下遇到想開小食店的呀浩尋求邦爺作顧問，促成了「餓媽家姐」的合作。籌備初時因葵廣店未正式last day，只有邦嫂及其他拍檔在尖沙咀店打點，但眼見邦嫂每日早出晚歸非常吃力，在葵廣店圓滿畢業及與拍檔商討後，邦爺便隨即連同招牌手工漢堡進駐尖沙咀店，繼續夫妻二人拍住上，並創作出多款新派小食，令「餓媽家姐」食物更多元化。
任意Budget的「餓媽個包」
葵廣年代不少網民大讚邦爺漢堡真材實料，而且充滿人情味。面對大部分有選擇困難症的食客，邦爺都會提出：「不如你話事想付出幾多錢，個包我幫你話事！」就是這份信任和與熟客之間的小默契，在葵廣店時已創造出熟客先知的hidden menu「餓媽個包」，任由邦爺話事，也可以由食客自由發辦。邦爺憶述曾經有位食客擺低$200，叫他自由發揮，既然食客出手闊綽，邦爺也不留手地配搭出芝士鵝肝手打羊肉漢堡，內夾大啡菇，還有黑松露醬原隻炸軟殼蟹，份量相當驚人。
邦爺煮食經驗雖然老到，但亦有遇過由客人發辦的奇怪組合。曾有客人要求「松露軟殼蟹加芝士再拼泡菜，醬料要茄汁，走包轉菜底。」轉菜底？記者當下以為在訪問車仔麵店。誰知邦爺不但沒有say no！更能夠發揮他的小宇宙，啟發到他推出「走包轉菜底」的健康選擇，也被列入「餓媽個包」系列。現在不少熟客也會追隨邦爺到尖沙咀，繼續感受隨漢堡包附送的人情味。
政府提倡的夜繽紛計劃邦爺無暇理會，亦相信香港人樂於捐窿捐罅搵好嘢食。邦爺指食店附近酒吧林立，不少人喜歡咬串魚旦食點小吃再暢飲。邦爺的創意理料相比夜繽紛市集的貴價小食更值得大家一試。問及邦爺的創業心得和未來大計，他雖然對香港的前景感到迷惘，但亦不忘自己的初心：「千祈唔好限死自己的創意和盲目追隨，做廚唔一定要規定自己是中廚西廚，可以是中式的醃法加西式的煮法，將自己學到的混埋一齊，就自然行出屬於自己的路。」同時他亦很感謝一直由葵廣支持到現在「餓媽家姐」的食客，並希望不久將來可以開堂食店，讓大家舒舒服服食漢堡包。
【餓媽家姐】
地址：尖沙咀加拿分道45-47號宏生大廈地舖D2店
營業時間：1pm – 11:30pm（星期一至四)、1pm – 12mn（星期五至日）
FB：餓媽家姐
IG：ohmumsister
