【編按：AndThen.hk誠邀飲食達人「煮場正氣姐」不定期為大家分享各種識飲識食好推介，保證獨家及真心。】
煮場正氣姐
FB專頁 煮場新聞 主理人，典型金牛「知識 L」（姐是知慳識儉啊！），從小食慣好東西，擁有黃金舌頭兼豐富飲食知識，日日扭盡六壬確保食得好、食出最高性價比，最憎呃神騙鬼飲食界敗類。
正氣姐最愛秋天沒有之一，往年這時節，正常我已飛了日本幾轉吃盡當造食材——秋刀魚、蠔、秋鮭、栗子、松茸 ⋯⋯ 今年被困香港，限聚下中秋又不能大伙團聚，唯有更早開始連環飯局，更多餐的大魚大肉、更多的月餅。但由九月中開始食到此刻，飽飽滯滯感已頂到喉嚨，難道要自此絕食？正所謂羅馬非一天建造，虧的體質也是積回來的。幸好正氣姐朋友多，今次等我搵幾個專家級朋友，同大家分享下他們的秋天飲食急救秘技先。
文：煮場正氣姐
圖：Unsplash、IG、ghibli.jp、honey and wellness
消滯三寶：青茶、薄荷、紫蘇
潮州人最愛 「食茶」(tsia tε)，沖泡工夫茶就如日本的茶道，是一門藝術。正氣姐細細個見阿嫲餐後必泡一杯香濃的鐵觀音，bonus 就是她活到 80 歲一生都沒長過半點肥肉。選茶學問甚多，但簡單來說紅茶是全發酵茶，咖啡因含量相當高；青茶則屬半發酵茶，咖啡因相對低；綠茶則未發酵，保留了最多的兒茶素，但較寒涼。鐵觀音、烏龍茶及水仙等都屬青茶，具消滯作用，亦不致咖啡因爆標影響睡眠。原來我阿嫲好叻叻！
我另一營養師好友 Arlene 則教路，不妨用薄荷茶來消滯排毒。Arlene 說吃過多月餅不僅容易消化不良，亦會攝取過多的脂肪而加重了肝臟的負擔。而一杯暖和的薄荷茶，既可促進新陳代謝，又可排出身體毒素，維護肝臟及消化系統的健康，所以不妨在家種植香草，隨時剪一些薄荷葉來泡茶消滯，又平又好用。就算不在家自種，薄荷茶包也容易買到，亦方便儲存，我自己都會在狂吃炸物後來一杯清清熱。但記得薄荷在中醫角度屬寒涼，飲用都要適可宜止。
而農夫好友黃如榮則教我飲紫蘇檸檬茶，不但有助消滯，更可預防感冒。其實香港人對紫蘇不會陌生，日本菜常用來搭配刺身，韓國會夾生菜包烤肉。雖則紫蘇味道濃烈未必人人喜愛，但既可解毒又能增強免疫力，學黃如榮加些檸檬來泡茶，味道就會更易入口。紫蘇與薄荷同樣可用新鮮或乾燥的，可以在香港有機農場或部分大型超市買到。
紫蘇有抗菌、止咳、降血脂等作用，檸檬則有助腸道蠕動幫助消化，加熱水焗或煲水都可以。
解救秋燥：蜂蜜、龍脷葉
秋天轉涼又乾燥，而乾燥最傷肺，所以唔照顧身體的人最易由喉嚨乾開始引起咳嗽。唔想因為秋燥咳兩聲，嚇到街坊彈走無晒朋友？秋天一定要出力頂住個肺！
正氣姐另一好友 Dakki 是香港少有的蜂蜜達人，她認為大家應好好善用家中常備的蜂蜜，因為蜂蜜可滋養喉嚨及肺部，亦有助化痰止咳、健脾潤肺。Dakki 教路不妨煲陳皮雪梨茶加蜂蜜來預防秋燥，做法是先把材料洗淨滾 20 分鐘，熄火燜 10 分鐘，放涼後加入蜂蜜即成。但要注意的是日本曾發生嬰兒食用蜂蜜後因肉毒桿菌中毒症死亡，所以一歲以下都不適宜吃蜂蜜；若是糖尿病、肝硬化患者，亦不宜服食蜜糖。
蜂蜜食法多多，亦可加進茶飲或果汁，提升美味並達致潤肺功效。
若不適合食用蜂蜜，則可試試黃如榮的農家解燥秘技——龍脷葉桑枝葉竹蔗水。基本上任何季節都可在街市買到這三種材料，但秋冬是龍脷葉當造期，如向本地有機農場購買，品質會更好。平時我家常用龍脷葉來煲「止咳湯」，加川貝、陳皮、無花果、南北杏，可舒緩肺熱咳嗽。而所謂「桑樹周身寶」，坪洲便有位 70多歲的日本農夫種桑樹，桑子（即桑椹）、桑枝、桑葉，甚至它的根或皮都可食用或入藥。日本漢方稱桑葉為「神仙葉」，會以處理茶葉的焙煎手法製作桑葉茶葉或茶包，用來潤燥清肺、抗衰老，所以大家別走寶。
黃如榮教路的龍脷葉桑枝葉竹蔗水，潤喉潤肺，加入清熱的竹蔗清甜度提升，是非常好的配搭。
食出好肌膚：當造水果、白色食材
乾燥又點止咳餐死。全日戴口罩再加上極乾的天氣，親友聚餐又吃煎炸肥膩東西加甜品，皮膚唔差就奇。正氣姐本身不喜歡水果，但聽完營養師 Arlene 教路，決定買多些雪梨、柑和柿子來急救皮膚。如秋天常見的雪梨，Arlene指含有人體必需的微量元素如鉀質、銅及錳，有助維持身體正常機能運作及保持皮膚健康。柿子則含有大量的類胡蘿蔔素，包括胡蘿蔔素、番茄紅素及葉黃素，同樣有利肌膚。
其實正氣姐都曾經年少無知，一年四季露腰、露腳，飲食愈生冷愈愛。後來經痛愈來愈嚴重、皮膚又差，花上多年調理好身體。十年磨一劍，我試盡坊間食療、養生秘技，學識防患未然，按四時吃喝玩樂。秋天是應該「養 肺 」，除了合時水果，我們也就乖乖見字飲水、多吃些白色的天然食材，如百合、雪耳、蓮藕。只要對抗到乾燥，便有助保養呼吸系統減少咳嗽，亦能保養免疫系統，預防痕癢及蕁麻疹。道理很簡單，但要持久才能看到成效，就由今天起建立良好生活習慣，大家共勉之。
