Netflix真人show節目《黑白大廚》雖然播放完畢，但餘溫不停升溫。節目中的「無限豆腐料理地獄」環節睇得津津有味，將簡單清淡的豆腐發揮至極。如果將香港人由細食到大的「豆腐花」參賽，又會否獲得好評？近月旺角就有間豆品店新面孔「豆公館」，主打每日新鮮製造共10多款的鹹、甜豆腐花、煎釀豆腐、滷水豆卜，以及坊間鮮有的豆漿蛋餅等。雖然食物種類不多，但店家就將豆品配搭出多款口味，早、午、晚三餐都啱食。店家更表示試業期間曾日賣過百碗原味豆腐花，令他們驚嘆：「原來香港人真係好鍾意食豆腐花。」

文：陳粒
圖：陳粒、店舖提供

木桶豆花 有鹹有甜

食豆腐花要夠滑而且豆味要夠濃，凍食或熱食、加糖水或黃糖都有不同派別，歸根究底都是新鮮從木桶「潷」出來較滋味。「豆公館」的豆品就使用加拿大生產的黃豆，每日於店內研磨煮成豆漿，再撞入木桶內凝固；木桶具保溫效能，可確保豆腐花凝固出最佳效果。由於每碗豆腐花均即叫即「潷」，所以不設冷熱選擇，吃起來微溫、豆味更突出。店家表示原味豆腐花始終最受歡迎，最能品嚐到豆腐花的原味道。另設9款甜食豆腐花，包括養生之選的杞子元肉紅棗黑糖、薑汁及黑芝麻；糖水之選有椰汁、花奶、黑糯米、紅/綠豆沙等口味。想試試惹味配搭，不妨一試麻婆豆腐花，微甜的豆腐花與自家製的辣醬，加入榨菜及蔥花，味道及口感頗新奇。

港台fusion 豆漿蛋餅

「豆公館」早上8時便營業，如早餐只吃豆腐花只夠攝牙罅，所以店家參考了台灣的早餐店，自家研發出「豆漿蛋餅」，就是加入豆漿煎成，口感比一般蛋餅柔軟香滑。記者試食了肉鬆蛋餅及麻婆腐皮蛋餅，前者加入大量肉鬆，鹹香開胃；後者則加入腐皮，口感層次豐富，配上榨菜及自家製辣醬，夠晒惹味。一份蛋餅切開三嚿，配豆漿，早餐份量剛好。不過考慮到午餐或晚餐未必飽肚，店家考慮將增設「加底」選項！如真的不夠飽，亦可加點其他豆品，如魚肉煎豆腐、滷水豆腐豆卜，或食碗柴魚花生粥、老乾媽炒麵、炒米粉等。

將設蛋白質套餐 盼豆品更年輕化

雖然香港有不少老字號的豆品廠及食店陪大家長大，但新手的「豆公館」其實亦抱著向豆品廠的目標進發，一方面希望本地製造的豆品得以傳承下去，二來希望更多年青人接觸香港傳統豆品，使豆品店年輕化。由店舖的裝潢、餐牌設計亦見花了不少心思，以大地色系為主調，配搭懷舊花紋地磚，感覺簡潔同時保留了本土味，加上旺角集不同年齡層及旅客，所以店舖走貼地親民的形象，希望適合任何界別，藉此宣揚本地豆品都有獨當的一面，以及本地獨有的豆品文化。

店家表示未來會更專注研發不同豆品，現階段為試業初期，努力聽取食客的建議加以改良，特別是食物的份量、油份控制等，有待正式開業後以更隱定的水準示人。另外，亦會計畫增設蛋白質套餐，標明食物的卡路里、蛋白質等資訊，照顧附近做gym人士作參考，攝取足夠的蛋白質，實行做多一步讓大家食得更健康。

【豆公館】

地址：旺角登打士街43號地舖
營業時間：8am – 11pm
Instagram：dau.gung.gun