Tufting（簇絨手作）工作坊近年開到成行成市，一支簇絨槍製作出來的毛冷製品，俘擄了不少人心。其實Tufting能在在一眾工作坊中突圍而出，可說是佔了天時地利；疫情之下，限聚、限飛、戴口罩等諸多限制已經讓人喘不過氣，但Tufting創作卻可以無限制，只要把毛冷跟著自己的構圖打上去，圖案在你的槍下就會逐步成型，療癒非常！
但Tufting過程需時，新手未必可在數小時內完成一幅作品。近月觀塘一間新開的Tufting工作坊「Slowmood」便主打坊間少有的無限制、無限時形式，只要客人願意花時間，就可以用一個價錢放心大玩Tufting，難怪開業短短三個月，客人已愈來愈多，更要搬舖以應付更多客源。兩位店主Yan及Venus雖為「零零後」，首次創業資金不多，但堅持以品質及客人體驗行先。而唔講唔知，Tufting所用的簇絨槍原來起源於香港50年代，真正「香港製造」，所以店主Yan對這股Tufting更有一個小小心願：「佢原本係50年代工業用嘅地氈槍，之後傳返出去歐美，變成人人都識嘅Tufting，再傳返入嚟香港，有少少唔想佢只係一種熱潮。」
文：Coco
圖：Coco、受訪者提供
速解Tufting （簇絨手作）
Q：Tufting點解會興起？
A：近年大熱的Tufting Workshop先由美國興起，源於纖維藝術家Tim Eads偶然在家中利用簇絨槍製作地毯，放上IG後獲得極大迴響，於是Tufting就漸漸成為大熱的消閒手藝。
Q：Tufting係做咩㗎？
A：Tufting的原理是利用簇絨槍把毛線以刺繡的方法，快速刺穿畫布，就如填色冊一樣，把毛冷在稿上圍邊、填色。製成品可謂五花八門，最常見的就是地氈，但也可以是杯墊、毛冷鏡子、擺設等。
Q：香港玩Tufting大約係點？
A：香港現時一般的Tufting工作坊收費由$600-$1200不等，根據畫框尺寸而定，通常限時3至6小時。客人需要自行起稿、穿線、打毛冷，收尾工作有部分店舖會選擇由店員完成，再寄到府上，亦有一些是由客人自己完成。
作品為本 賣體驗更賣理念
Slowmood兩位年輕店主Yan及Venus在大學「上莊」認識，早已默契十足。今年偶然相約去Tufting，發現二人原來同樣喜歡手工藝，店主Yan更在課餘時間自學插畫，曾經開展接插畫稿的小生意。見Tufting熱潮正在蔓延，適逢Yan的畢業後空窗期，決定與正在擔任護士實習生的Venus一同租借觀塘工廈的單位，創立了Slowmood，主打「慢活」理念，而且摒棄網紅打卡式的室內設計，把資源都留給購買靚料。
負責財政的店主Venus提到：「如果有多啲（錢），我梗係想整靚個場，不過相比之下，我寧願扔錢落啲材料到，始終間舖頭整得靚最多用嚟打卡，但係啲作品客人係要拎走。」
坊間的Tufting工作坊，要親手整出一張地毯分分鐘上千元，而且時間亦限制在5、6個小時，手腳慢少少都做唔切。因此Slowmood兩位店主考慮過材料和成本後，決定推出無件數、無時間限制的Tufting工作坊。店內一共提供三個尺寸的畫框，分別是適合製作杯墊或小擺設的50×50 cm（$500）、適合小型地墊的70×70 cm（$670），以及適合中型地墊的90×90 cm（$950）。定價相比起同類型工作坊價錢更平，而且只要框內的畫布仍有位置，在營業時間內你喜歡整多少件作品都得，性價比更高！
不過沒有接觸開藝術、畫畫的初哥，有機會在Tufting一開始就被徒手起稿難倒，所以兩位店主都會事先幫客人在畫布上起稿，亦是坊間少有的做法。問到為何願意花時間做多一步，店主Yan只是笑笑：「咁啲人嚟玩Tufting都係想打毛冷，而唔係坐係度畫畫。」
慢，都要慢得有價值。Slowmood的理念是希望客人不會被時間、件數、起稿等細枝末節影響，而能夠專注在Tufting的過程中；兩位店主更形容「唔怕客人慢，最怕大家整唔到自己中意嘅作品而後悔。」
實際上，真的有客人試過因心急而令自己心愛的作品報廢。「試過有客人嚟整，結果打打下打穿咗張畫布，佢交低咗俾我哋修補。後尾發現個窿有啲難整返，問咗客人之後決定幫佢重新打過。（唔收錢？）係呀，唔收錢！」Yan說罷都自認有點完美主義，可能旁人會不能理解為何「有錢唔賺」，但也許就是這份執著，令客人願意選擇Slowmood，而兩位店主亦樂在其中。正如Slowmood的中文名「萬活、漫玩」，生活和玩樂有一萬種方式，與其跟隨別人，路漫漫就不如放慢步伐，做自己喜歡的事情就已經很足夠。
難關難過關關過 堅持動力來自客人
在短短開業三個月，Slowmood已經搬了一次舖，新舖比起舊舖可以容納更多客人，也能接Team Building。其間，兩位店主其實也質疑過自己創業的決定是否正，店主Venus坦言一開始有擔心自己「零零後」的身份會否令客人感覺兒戲：「其實都怕自己望落太細個，教班嘅時候俾唔到信心客人。結果有個嚟咗兩次嘅客人同我地講，見我哋兩個一腳踢，自己經營呢間舖好叻，嗰下聽到其實都開心。」
一句微不足道的肯定，其實對兩位店主初哥是很大的認同。Yan亦曾因拍擋尚在實習分身不暇，高峰時期全個星期都要留守教班，再要花額外時間為客人起稿，Yan坦言很累，然而看到Slowmood開始儲到回頭客，她亦沒有後悔推出無限制的服務：「好多嘢都係將心比心，做多少少其實冇咩所謂，攰咪慢慢嚟囉！」
參加Tufting的大部分客人也是和伴侶或三五知己一起報名，一邊聊聊天、一邊整地毯，既可以在疫情難以見面的情況下趁機會交換近況，又能親手把腦海中的圖案做成毛冷作品，所以特別有成功感。而過程途中，配上簇絨槍「突突聲」的白噪音，也令人放鬆又療癒。
兩位店主直言開業以來最感滿足的時候，就是客人親手完成作品後的拍照時刻。不少看似複雜的圖案作品，實質大部分都是Tufting新手，難怪愈來愈多人愛上這種簇絨手作工作坊了。
50 X 50 cm 客人作品
只是整一個中文字放在家中做擺設也十分有格調！
50 X 50 cm 客人作品
毛冷中間包著鏡子，放在家中既能當裝飾，實用性亦滿分！
50 X 50 cm 客人作品
最細的尺寸亦能幾個整到超軟熟的杯墊～
70 X 70 cm 客人作品
只要有心機，深淺明暗一樣做得出！
五大Tufting新手貼士
Tufting製作所花費的時間雖然相比起一般手作更耐，但摸到軟熟毛冷、在簇絨槍的白噪音下「打」自己設計的作品，相對地一般手作自由度更大、更治癒！Slowmood的兩位店主亦決心「以慢抗快」，只求在繁忙的都市中，有個可以讓人慢下來、只做一件事的空間。
不過長期專注在一件事上容易心神疲累，新手入門撞太多板更容易氣餒！所以兩位店主亦不藏私，分享五個貼士俾想嘗試tufting的大家，一於齊齊入坑Tufting！
雖然兩位店主有為每個尺寸加上預計製作時間，但是實際上連上收尾、出錯和練習使用毛冷槍的時間，通常還要多出一至兩個鐘，更有客人製作最大的尺寸花了約十一個小時，所以大家Tufting時最好預留一天。
簇絨槍在打毛冷時只能向一個方向前進，不可以向後打或向下打，所以如果要轉換方向，需要提起簇絨槍，重新落針。
填色的部分則是一行行「填」上毛冷，行距愈窄，成品就愈厚，愈難看見造型，所以切勿重手。
簇絨槍下針的速度頗快，每次提起為了避免誤觸，都要先關機以策安全。
如果想令毛冷凸出的效果，就需要把剃毛器傾斜以便剃出坑紋，把握好「遠小近大」、「『凸 』出重點」 你也可以做出有層次的tufting！
【「萬活·漫玩 Slowmood」】
營業時間：12pm – 9pm
地址：觀塘敬業工廠大廈3樓D3室
價錢：50×50 cm（$500）、70×70 cm（$670）、90×90 cm（$950）（二人一框 +$150、八人起包場、全預約制）
預約電話：55736174 （僅限Whatsapp）
IG：@slowmood.hk
FB：從缺
