很少藝人是以髮型令人記得的，但吳日言初出道的冬菇頭是許多香港人的集體回憶。冬菇頭沒留久矣，事實上吳日言的藝人身份也離她漸遠，2018年她做了媽媽，同年開飯糰店，快將有第六間。

十多年內一個冬菇頭歌手變成多功能媽媽，變化很大——「都唔夠呢兩年香港變化大！」訪問未roll機，吳日言先拋下感慨。「是很愛這個地方，但開始不信任這個地方，有點可悲。」Artist靚靚妝髮底下，感觸之情已藏不住。

文：劉連
圖：林虎、受訪者
場地提供：My Fitness

冇咗我唔得

2018年吳日言發生了兩件事，她形容是「好事成雙」： 生女，和開鋪。

她記得生女當天，準備被推入產房，老公在門外傾新舖裝修。「我話，你可唔可以尊重吓我，我就嚟幫你生仔啦喎！」剛好醫院和舖頭是同一條街，冇夾過，「好似上天就係同時間俾呢兩樣嘢我。」

開飯糰店，她原本FF自己是掛名老闆娘，「諗住夾吓錢，著靚靚剪吓綵，講聲『呢間舖我㗎』咁樣。」結果她看到老公瞓晒身，每朝四點起身煮米包飯糰，生完BB沒多久也就落埋水。現時管數、找數、出糧、請人、訓練員工、整食物價錢牌通通包辦，「想將價錢牌整到有日本feel，我去DONKI取經，回來照辦煮碗。」訪問當天跟她返舖，她一歸位就有事做，連桃哈多也知道收埋邊度，「做生意，冇得懶。」

她沒有三年抱兩，飯糰店倒是兩年開六，代價是每個月頭一個星期冇得去街，留在office埋數——「Office就係我屋企張書枱，唔好以為好有規模！」

做媽媽已經是一份沒有收工時間的「工作」，加上店務纏身，吳日言自言不是緊張型母親，還在IG上自首忘記為女兒報幼稚園，事情還是處理不完，「我而家每日行程係冇行程，哪裡需要我，我就要去幫手，on call every day。剛好個女也到了識得扭大人陪玩的年紀，還有太太身份呢，一個家庭的晚飯都好重要，這些我都要去維繫。」

「有次在屋企個group講，我今晚去食飯，你哋『食自己』，大家反應好大好大；我諗，點解我唔可以有自己時間同朋友食餐飯！」呻歸呻，她也驚覺，屋企真係冇咗佢唔得。

要應付多重身份，她之前還有做gym鍛鍊體力，健身室停業，人就懶了。日常滋養身心的活動，剩下煲韓劇，每次十分鐘，好過冇，「好需要，要睇返愛情劇，俾自己青春嘅感覺！」

想走，唔想走

吳日言相當貼地，懷孕時患上妊娠糖尿病，她跟大家分享如何注射胰島素，談起香港人熱門話題——移民，她也跟大家一樣，申請BNO、周圍找資料、看小朋友讀書哪些區份好。

「如果我冇下一代，可能未必咁迫切。」

「有下一代，就會關注教育。你想唔想佢接受未來嘅教育？唔知會加啲乜嘢落去喎！會唔會有個框架限制佢嘅表達？我經歷過好free的社會，都會想掙脫現在的框架，何況小朋友？作為一個媽咪，如果唔為佢諗，太唔負責任了，不如唔好帶佢嚟呢個世界。」

作為媽咪，似是非走不可，作為香港人，是點解要走。

「移民，好似是要做，但同時覺得，點解要我走啫，我都幾鐘意呢度，呢度係我屋企，唔係好想走。」上一秒還以綜藝tone分享日常趣事，一聊到移民，眼濕濕鼻紅紅。「有時都會自我調節心理，唔係嘅，我唔好咁諗，係為咗小朋友著想嘛，想起萬大事以個女的前途行先，波動的情緒會緩和一點。」

「講真，前半生真係冇諗過移民呢個字，以為就算有下一代，都會繼續在香港生活。但這兩年發生太多事，係愛呢個地方，但開始唔信任呢個地方，有啲可悲。」

逆市 出擊

談移民是彈出彈入，談生意卻是勇往直前。2019年社會運動，飯糰店生意OK，至2020疫情殺到，挑戰來了。她其中兩間分店，一間山頂，一間近學校，零遊客、停課，斷正米路。有報導指生意跌七成，連蝕多月。

「最傷感的時刻，是收舖時見到飯糰依然擺滿，會知道香港有事發生了。」

默默把飯糰收好，帶回家做晚餐，吃的不是飯，是苦，「又唔係慘嘅，當多個機會了解自己舖頭出品，研究如何改善。」可以叫阿Q，但做生意，要有這種轉負為正的能耐。

「看到生意下滑，又要出糧，難免心悒。不過坐喺度閉翳，只會消磨士氣，不如去找新商機。」

這大半年，她看到市場洗牌，旺區神話不再，轉戰民生區可能更有利，所以年頭開了觀塘店，牛頭角和大學店也即將登場。逆市出擊，不靠勇字，靠計數。「現在租金比之前平近六成，如果平六成不去做，等幾時？」

沒時間追究運氣，「有人會問，係咪唔好彩呢？我想的反而是，沒有一門生意是賺硬，好成績，我嘗過，現在捱緊。假如我捱得過，到好景時我會更順利吧，就利用這個期間慢慢學習。」

正能量跟飯糰餡料一樣飽滿。