本地餐具設計奪德國大獎︱22歲學生Alvin：讀設計後連機都唔打

德國紅點獎，一場舉世知名的設計競賽，幾乎所有設計師都視之珠璧，以奪獎為榮。月前，港產餐具設計「原石」擊敗了逾4,000個設計概念，奪得2021紅點設計概念大獎的最佳設計獎。設計者廖成鍇（Alvin）以22歲之齡躋身國際舞台，問及感想，他腼腆地笑道：「其實我覺得這套餐具完成度未達100%，仍有許多改進空間。」然而餐具擺在HKDI展覽紅點設計展中，理念卻毫不遜色於其他前輩，只因為「原石」內蘊含著Alvin以人為本的設計初衷。

文：Layne
圖：Layne、受訪者提供、HKDI Gallery

「原石」的設計處處針對使用者用餐習慣，外形又符合人體工學，體現了Alvin「以人為本」的設計理念。

「咦，張枱咁頂腳嘅。」

甫坐下與「原石」餐具的設計者 Alvin 照面，簡單一句說話已讓人窺見他的設計靈感來源：來自對日常生活的細微觀察。這種對事物的敏銳觸覺，讓他培養出非一般的共情能力。「其實Product Design與人的生活息息相關，就好似呢張枱咁，一坐低就頂住隻腳，我們很容易就感覺、接觸到，每件產品都影響著我們生活的經歷與感受。」Alvin自幼喜歡畫畫，人生第一次到書店買書便入手了一本人像素描畫冊，自此逐筆勾勒出自己人生方向及對設計的興趣，在HKDI產品設計學科畢業後升讀理工大學的產品設計學，步入了設計的大門。

「點解會揀產品設計呢條路？我諗係因為我由中學開始就好Enjoy做義工，譬如探訪獨居老人、同自閉症小朋友玩。」本持著一顆赤子之心，Alvin每每見到弱勢群體就會不由自主地思考：「點解唔可以每一個人生活都咁好呢？我可以怎樣去做啲嘢？」在接觸產品設計之後，他方知道設計的目的就是提升不同人的生活質素，於是開始抱著惠及身邊的人、弱勢社群，甚至是大自然環境的想法來構思各款設計。

中學時Alvin已定下要成為設計師的理想，奪得紅點獎是他設計生涯上一個重要的里程碑。

原石：源自與家人用餐時光

「有次同屋企人食飯，留意到媽媽煮完飯之後呻手腕好攰、開始發痛，原來是倒餸的時候手腕凌空，日積月累下造成勞損，我就開始諗，食餐飯啫，點解都會咁攰？明明係同家人難得坐埋一枱嘅時光，唔係應該享受㗎咩？」適逢需要呈交畢業Project的構思，於是Alvin以此原點，開始觀察家人用餐習慣，例如鍾情飲湯的爸爸往往因匙羹無處擺放而好遴迍、自己飲節瓜粉絲湯時想夾起粉絲又會瀡嚟瀡去等。

Alvin認為中式餐具讓他聯想到與家人享受一餐飯的過程，對任何人來說都是極其重要的時光，所以以此為改造對象。

他以改善使用者的用餐流程為焦點，嘗試改造日常中式餐具，構思出一套可承托炒鑊、煎Pan等鍋具的湯碗與碟，採用凹凸齒紋防止粉麵滑落的飯碗與筷子，平放時匙羹頭不會接觸桌面的湯羹，及可同時承載醬料與食物碎屑的醬料碟，既讓使用者可以舒適地享受與家人用餐、共聚天倫的時光，亦為餐具這種默默照顧用家需求的產品賦予新的價值，故將餐具命名為「原石」。畫草圖、製作模型、改良，無數次重複以上步驟，前後共花半年時間，Alvin表示單單一個湯碗的設計就起碼改過十多次。

「其實一開頭冇諗過會攞獎，直至收到Project Tutor訊息：『Congratulations, Red Dot Best of the Best Winner』，我先知道自己攞獎。」性格沉靜的Alvin笑言當時並未有太大反應，只是心想「哦，Okay」，但事實上這獎項卻大大地鞏固了他對產品設計的信心，令他認定自己在這方面有發展空間。Alvin的說辭謙遜，卻無改他的過人成就，要不然不會被HKDI Gallery將他的產品並列於Sony Walkman 隨身聽、Mono A 餐具、Fiskars 剪刀和Apple iPhone等一系列簡約而具突破性、同樣獲紅點得獎產品一同展出。

雖然「原石」獲獎，但Alvin仍然認為它有許多改善空間，例如多邊形碗碟、醬料碟的內角過多，清洗時不太方便。

寓娛樂於設計好玩過打機

單單一套餐具，需要花費近半年時間設計、改良，廿歲出頭的年輕人正值飛揚浮躁之時，少不免會有心神紛亂、難以集中的情況出現。「其實設計過程中有時都會撠住，甚至一頭栽進了死胡同，掉入了設計的大忌：產品複雜化。」Alvin接而分享自己在遇上樽頸時的一道良方：落樓行嚟行去！他發現散步時經常會靈光一閃或碰上意想不到的收獲，「譬如我嗰時落到樓下河邊，留意到一塊飄在石頭上的樹葉，就突然茅塞頓開，想到匙羹的外形可像樹葉一般：葉柄重、葉面輕，於是就將匙羹構造成柄位較重的懸空設計，解決了一大難題。」

難題繁多，咁你又有冇試過想放棄，索性Hea咗佢就算？Alvin輕笑道：「咁又真係冇喎，因為我自己好享受設計的過程，我讀設計之後，直頭連機都唔打，因為我覺得Design好玩過打機。」對於Alvin來說，設計產品過程中的構思、畫圖、發掘問題、解難等步驟就是最佳的閒暇活動，他甚至話：「我唯一娛樂就係參加設計比賽，或者做唔同嘅Design Project，寓娛樂於設計。」加上每次參與新的設計，Alvin都會發現自己在創意、設計觸覺上的進步，難怪會「我自樂此，不為疲也。」

「其實一開頭我都唔係咁有諗法，揀設計科嘅時候都好驚自己唔夠Creative、諗啲嘢太普通，又或者唔夠人哋轉數快。但係我慢慢發現原來設計得多，嗰套Design Thinking的Mind Set就會有進步，例如學識點樣去發掘問題、搵出產品的焦點與服務對象等，明白到人唔係天生就識得點去做Design，逐漸對自己的設計有信心。」

放棄投資者的量產邀約

紅點設計獎對設計師而言是一份莫大的殊榮，當問及Alvin未來還有什麼目標時，他腼腆地笑道：「其實我一直好想成為全球最出名嘅Designer之一，所以成日會用自己嘅作品同名師設計『攀比』一下，睇下佢嘅設計風格係點，我又可以從他們身上學到啲咩。」Alvin又說道：「曾經有投資者接觸我，想將『原石』量產化，不過我仲讀緊書，想畢業先決定。」

放棄推出「原石」的機會，旁人聽見都會大歎可惜，但Alvin卻說：「其實冇咩需要可惜，因為點都有機會可以做到出嚟，甚至我自己去develop都得㗎嘛。況且宜家有咁多機會，譬如眾籌又或者HKDI本身都有唔同funding。即係唔會有死路囉，只不過係時機的問題。」

Alvin認為：「設計冇話Boom一聲開竅」，只有默默地改良、學習，從而找對自己的設計風格。

Alvin又勸勉有設計夢的香港人：「如果有啲事情放棄咗會驚後悔嘅，咁咪做咗先囉。」「原石」並非Alvin設計路的終點，他興致勃勃地分享自己最近正與理工大學同學埋首Final Year Project，希望針對家居廚餘問題，設計出一套可讓香港人樂意參與其中、能處理不同地區廚餘的系統，不過目前計劃仍處於構思階段，至於結果如何，就要等「做咗先知」。