田蕊妮一直和杜汶澤在一起。「細個睇見長輩結婚40周年，會覺得嘩⋯⋯一齊咁耐得唔得㗎？點知現在自己跟杜生也結婚18年了，時間過得好快。」近年他們的「在一起」發生微妙變化，杜生移民台灣，她港台兩邊走，瞓身打點老公的網台《喱騷》。兩公婆時而分隔兩地，但因為攜手共事，「真正溝通的時間反而比以前多，更加了解對方。而家我最想同佢喺埋一齊，因為最開心！」
情深說話唔怕講，近月她天天排練關於夫妻關係的舞台劇，更滿腦子想著婚姻。阿田即將與林日曦飾演夫妻，奇在各有各演——她做喜劇《大離婚日——妻》，他以視像遙距做《大離婚日——夫》，是兩齣分開上演的獨腳戲。阿田會搞乜？據杜生在FB透露：「一直以為我老婆返香港做個笑死人嘅舞台劇，點知笑完一輪，睇見佢喊，我都喊咗。」
文：凌梓鎏
圖：StevenWuCF
化妝：Meegan Seak、髮型：Jude Lam、服裝：HARRISON WONG
《聖荷西》後愛上舞台劇
阿田的《大離婚日——妻》今天（12日）率先開鑼，本月尾再到林日曦的《大離婚日——夫》公演，兩人先後各做十多場獨腳戲。兩劇均由林日曦執導和編劇，阿田解釋，又《妻》又《夫》其實唔複雜，「觀眾只看一套也ok，絕對不會睇唔明，如果睇晒兩套，你便會發現兩者之間有很多關聯。」故事講述老婆嗌離婚後，忽然發生大事，老公陷入昏迷。「我想叫醒他的同時，慢慢回顧了整段婚姻。」
獨腳戲不等於只演一角，「我要演女人，又要演男人，有時還一人分飾幾角，好忙！」去年林日曦首次做舞台獨腳戲《大初戀日》，阿田懷疑他演上癮：「他的性格比較自閉，演戲沒對手，可能感覺更自在。但我知道今次要做獨腳戲，最初是say no的，會擔心自己一個人上台，搞唔搞得掂呢？」雖然怯，但她抵擋不了舞台的吸引力，前年參演莊梅岩編劇、甄詠蓓執導的《聖荷西謀殺案》是重大轉捩點，「那次的經驗，令我真正愛上舞台劇。」
從前她由亞視做到無綫，電視生涯長達廿多年，舞台劇的CV卻很空白，演《聖荷西》前，只在2005年與黃凱芹做過音樂劇《白蛇．青蛇》，是她想起當年表現，仍會怪叫的黑歷史：「喂呀，嗰陣時我真係唔識handle，根本唔知自己做緊乜！」甚至嚇到自此絕跡舞台。十多年後遇上好劇《聖荷西》，才終於令她開竅。「做完我發覺，一個演員沒試過舞台演出，不會知道演戲有幾令人享受。當你在台上演出時，會感受到觀眾的反應，而且每一刻都發生緊，那種即時的交流好神奇，與拍劇拍戲只對著鏡頭溝通完全不同。」難怪今次做喜劇《大離婚日——妻》，她被林日曦以聞名的「黑面」監督排戲，也心甘情願：「佢真心黑面㗎！不過對住咁難笑嘅人，我都令佢笑得出，上到台應該ok！」
能替杜生洗碗是小確幸
因為《大離婚日——妻》，阿田在舞台首次做獨腳戲，也首次做喜劇。「林日曦諗到用喜劇來講婚姻這個話題，係幾有趣的。老實講，很多夫妻一齊太多年，已經不再有幽默感，好難笑得出，只看到對方的不是。」難得她與杜生在網台《喱騷》的清談節目《杜氏閒情》中，經常自爆相處點滴，仍能真心笑到肚痛。當然，她結婚18年，說沒想過離婚是騙人的。
「一個人靜下來諗起、嗌交時衝口而出，乜嘢情況都試過。I am not alone㗎，我諗九成夫妻都曾經閃過離婚念頭。」但她慶幸，自己至今離不成婚。「婚姻是很重大的人生課題，令我學識唔好只諗自己。其實人生有另一半陪伴，什麼事都可以面對，都一定捱得過。」尤其過去幾年見證社會變天，疫情會令宇宙停擺，杜生更去了台灣。阿田在《杜氏閒情》分享過，從前天下太平，兩公婆同住香港時，杜生下廚後七國咁亂，她會洗碗洗到心生怨恨。後來做了Long D夫妻，當她飛到台灣，才感受到能替杜生洗隻碗，也是小確幸。「原來有機會照顧他，是很幸福的。雖然有時洗碗洗太多，都係想爆粗！」
世界很壞，她卻似乎很坦然，總說「唔緊要」。「對我來說，現在最緊要是杜生身體健康，因為他心臟不太好。同埋大家最緊要開心啲！」禪修是杜氏夫婦的良藥，阿田曾經有段鬱結的日子，還會天天寫下自己的感受。「純粹寫下來，不用重看，也不用judge自己。寫吓寫吓，像倒垃圾般，能慢慢梳理內心那一大嚿混亂的東西。」阿田覺得做人也好，演舞台劇也好，「別想太多或太遠，那不代表放棄自己，而是盡力做好手頭的事就夠了，這樣你反而會更enjoy當中的過程。」
【舞台劇《大離婚日》】
《大離婚日 —— 妻》
日期：5月12-14日及16-21日、23-25日 8pm；5月13-14日及20-21日 3pm
地點：香港演藝學院歌劇院
票價：$780／$680／$580／$480
《大離婚日 —— 夫》
日期： 5月26-28日、30-31日、 6月1-3日 8pm；5月26-28日及6月3日 3pm
地點：香港演藝學院歌劇院
票價：$480／$380
購票：快達票
