【編按：AndThen.hk誠邀飲食達人「煮場正氣姐」不定期為大家分享各種識飲識食好推介，保證獨家及真心。】
煮場正氣姐
FB專頁 煮場新聞 主理人，典型金牛「知識 L」（姐是知慳識儉啊！），從小食慣好東西，擁有黃金舌頭兼豐富飲食知識，日日扭盡六壬確保食得好、食出最高性價比，最憎呃神騙鬼飲食界敗類。
最近又多了人談論要買多個小冰櫃——我好明，因為這些年人人在家日夜煮，每周入貨都大傷腦筋。雖然小冰櫃的賣點是行李喼大小，但一家幾口幾百尺單位，多一個喼都嫌多！除非你每星期都原隻鱈場蟹、整件rack咁買，或者貪平量購省錢？否則冰櫃、額外電費都是成本，加上老公可能大叫：「你買冰櫃點解我唔可以買個1:1 figure擺？」 一個小冰櫃隨時攪到闔家不和。等我煮姐正氣姐醒你雪櫃慳位大法三式，點樣運用現有資源空間——慳位醒目買！從今日起動態清零，奪回空間主權，咁就唔會屋企愈住愈迫。
文：煮場正氣姐
圖：煮場正氣姐、Unsplash、IG
第一式：斷捨離真義 了解自己
日本人每周的分類都好仔細，計劃定煮什麼便買什麼，更於購入後分類處理，如先切、醃部份肉類，放工快煮會很方便。
現代「斷捨離」思想老過你同我：「斷絕不需要的東西；捨去多餘的事物；脫離對物品的執著」，絕不是始於收納女王近藤麻理，亦都不是打開個櫃望住死物尋找「怦然心動」。拯救雪櫃奪回空間首要是有「斷捨離」精神，斷絕不需、捨去多餘、脫離執著，而且必須了解自己生活習慣。
「知己知彼，百戰不殆」，孫子兵法無點你。坊間好多收納法，但不是人人合用。我每次睇近藤麻理都發火，美國好多屋大到住得落我整個家族， 他們的雪櫃非常大，有空間可無限分類，如果互換空間，我一世都無頭痛。但香港是我家，不要去羨慕不要去妒忌，不如實際運用孫子兵法，入貨前先認清自己個雪櫃的可用空間。
日本的雪櫃收納常建議自製分隔，但我不主張，因為香港屋細雪櫃細，一塊板也佔用空間。
其實我也算是一個購物狂，每次出街都可以滿載而歸。但非常時期要實行非常手段，疫情期間最重要是保持健康，營養飽肚是首要，其他物慾暫時放下。認知自己的實際需要，便可設計購物清單，如今次目標是一周足不出戶每日煮兩餐，購物的時候只選擇一周的食材，其餘會佔雪櫃位置的都盡量放下。
Do’s
- 了解自己雪櫃的空間分佈
- 想清楚每星期自煮次數
- 計算需要的糧食份量， 按需要設計購物清單
- 只選購合適與實用的食品、醬料、飲品
- 為地球設想 ，只購買「需要」的食物
Don’ts
- 忌恐慌性消費
- 不需囤積糧食
- 非常時期避免購買佔用雪櫃位置的奢侈品，如雪糕、汽水等
- 不宜無目標去瀏覽網店或逛超市，容易亂買變成過度消費
第二式：過期無需要，走！
施主，可必呢？咁塞法最後又用到幾多？
很多人，特別是長輩，都喜歡儲存「東西」在雪櫃。藥膏、化妝品、上世紀的醬汁、唔知幾多年前的月餅、大量藥材等等。你問：「幾時用？幾時食呀？」永遠都答遲下先啦。聖經傳道書有云：There is a time for everything。是的，凡事都有定期。過期食物會滋生病菌，夾硬食會死人！施主回頭是岸啦！希望耶穌打救到你，奪回雪櫃有限空間。
而且雪櫃不是萬能的，並非所有東西都適合放入雪櫃，尤其是生果、香料及藥物。未成熟的生果如牛油果、水蜜桃、蜜瓜等（進口水果一般未成熟已收割，防止運送期間已過熟腐爛），只要未切開都不宜放入雪櫃。雪藏會阻礙水果成熟，反而室溫存放水果會變得成熟美味。至於一般藥物（除非列明）更不應儲存於雪櫃，因雪櫃門常開關，有機會在藥物表面凝結小水點，藥物受潮可致變質或發霉。
另外記住層層疊是用來玩的，不是最好的儲物方式。如雪櫃東西太多，一層疊一層，令到出風位被遮蓋，近出風位的東西便會結冰，但雪櫃其他位置又會不夠凍。如此會影響了食物的保質期，最後也是白白浪費了食物和雪櫃的儲存空間。
Do’s
- 養成定期檢查及清理雪櫃的習慣
- 盡快處理即將到期的食物，自己唔食都可以送人
- 認識「最佳食用期」及「此日期或之前食用」
- 「最佳食用期」（賞味期限）代表標示日期後仍可食用，但風味有所變化或變差
Don’ts
- 雪櫃不是「雜物房」， 戒掉什麼都放進雪櫃的習慣
- 如產品標示為「此日期或之前食用」，即保質期，保質期過後不宜食用
- 注意包裝開封後，保質期便不適用，不能長期存放
- 避免將未熟的生果放入雪櫃，過早放入雪櫃會妨礙熟成
- 香料亦不應放雪櫃，因門常開關，溫差容易引致受潮
英國時裝教母西太后Vivienne Westwood近年鼓勵「buy less, choose well and make it last」，針對fast fashion危害地球。其實亂買食材塞到過期，唔食同丟棄都同樣可恥。
第三式：薄身包裝免處理
除了想清楚數量，包裝款式亦要思考。我記得最高峰期我要一次購入兩個星期的糧食，盡量減少與外人接觸。同一個大小的冰箱由放20份肉變成要放40份，當時我只購買肉片、魚柳，40份肉順直排輕鬆捱過了兩個星期。
雖然很多雪藏食品都可以存放一年以上，但新鮮蔬果則要常常計住食用期，所以除了確認所需食用量，入貨前也要想想哪些食物更耐放，以及如何配搭食用。以蔬菜為例，較耐放的豆瓜類可用作炒蛋、 炒飯、炒米粉、炒肉片、蒜蓉清炒，或是意式烘蛋、法式鹹派……等等皆可。但不耐放的葉類菜，如菜心、菠菜，通常兩三日後便爛。
這位施主之前的排列方式亂糟糟， 全部一包兩包疊住， 除了最表面的雪糕、corn dog，其他一拉底，上層的東西就會跌出來。整理後雖有輕微改善，但仍不理想。
另外就是雪櫃門一日開幾廿次，門常開熱廚房，溫度一定較高，所以垂直放不耐寒、不耐放的葉菜更好；若平放葉菜，不止容易壓壞，膠袋或保鮮袋內的水分更會令葉片更易變黃或腐爛，也是甚為浪費。
總之雪櫃整齊，煮飯先會更輕鬆，面對飄忽疫情都可以隨時煮餐好去獎勵自己；盡量均衡飲食身體才會健康，大家一齊努力！
Do’s
- 購買真空包裝牛肉片、豬梅肉片、去骨魚柳等包裝相對薄身的食材
- 購買較耐放的蔬菜，如法邊豆、茄子、意大利青瓜、苦瓜、節瓜等
- 蔬菜開始欠生氣，可先略煮存放於保鮮盒，續命多3-4日
- 部份萬能耐放蔬菜，如紅蘿蔔，可預先切件、切片、刨絲，方便一周內煲湯、煮肉、炒米粉等
- 盡量善用不佔雪櫃空間，可原個用棉質蔬菜袋吊起存放的蔬菜，如洋蔥、薯仔、蕃薯、南瓜等
- 宜儲備BPA free罐頭番茄，放食物櫃不佔雪櫃，做汁煮菜皆宜
Don’ts
- 避免遮擋雪櫃出風口
- 骨多肉少部份不宜多買
- 忌購買大量不耐放的葉菜， 如菜心、莧菜、 菠菜、 通菜、 唐生菜、 芥蘭、 白菜
- 不宜購買膠盒包裝的肉類，轉包裝儲存又浪費時間
- 盡量不要疊放，取用不方便
只要排列得好，按食用時序排列，可省卻尋找物件的時間。
