葛民輝（阿葛）久久沒演舞台劇，上次是2014年軟硬天師獨撐全場的《笑の大学》，翻譯自日本喜劇大師三谷幸喜的劇本。當時阿葛演劇作家，為通過日本二戰時的嚴苛審查，扭盡六壬修改劇本，愈改愈爆笑，劇情放諸當下香港很應景。阿葛講笑：「若遲幾年先上演，可能我返唔到深圳啦！」
阿葛說，劇界從來鮮有向他招手：「譬如進念（藝團）早至黃耀明演出的年代，作品好正經㗎嘛，冇乜人會搵我。」劇裡劇外，搞笑都有它的力量。今次風車草劇團請阿葛演出的《Di-Dar》自稱「黑心喜劇」，參與編、導、演的梁祖堯（阿祖）說：「開宗明義是帶歡樂畀大家！」阿葛說穿風車草的作品，總笑裡藏反思，「他們不是搞笑咁簡單。就算笑住同你講嘢，都令你喊住諗起我。」
文：凌梓鎏
圖：StevenWuCF、網上圖片
他們不是搞笑咁簡單。就算笑住同你講嘢，都令你喊住諗起我。
葛民輝
撻返著大家的表演魂
《Di-Dar》是音樂劇場，劇名取自「啲打」，即殯儀法事常見的樂器嗩吶。全劇除了跳唱搞笑共冶一爐，阿祖還預告是有人死、有鬧鬼的故事。劇情講阿葛飾演基督教中學校長，為免被殺校而硬推中樂活動，拿撥款資助吊命。結果壞學生加入中樂團，學校又鬧鬼要做法事驅邪，七國咁亂之中，吹啲打的聲音竟撻著眾人的表演魂。笑料百出背後，阿祖說：「今次想人思考的是夢想，無論幾怕醜，我諗每個人都愛表演的，只看哪裡是屬於你的舞台。表演能讓自己和別人開心，不應被壓制，但在香港，很多事令人揍熄了自己團火。」
風車草台柱阿祖、湯駿業和邵美君，都演阿葛校長的舊生。劇中阿祖是個喃嘸師傅，「我的角色細個讀書唔成，被當時是老師的阿葛踢出校，令我嬲了他一世。」兩人因《Di-Dar》才首次合作，以往也沒私交，阿祖是托共同朋友彭秀慧，邀請阿葛參演的。阿葛興奮形容，對阿祖的印象是愛吃的自肥達人。「之前我做過餐廳顧問，開始留意到阿祖的ViuTV飲食節目。嘩，佢堅隊晒啲五花腩入口，又諗埋啲古靈精怪宵夜，真心鍾意食嘢！彭秀慧提我排劇時要忍口，因風車草是夜鬼，阿祖會有好多宵夜令人腰圍淪陷！」
口講美食，兜個圈他在讚阿祖是熱血劇場人：「願意與工作人員分享自己喜歡的食物，那個一定是好人，而且很熱愛他的工作。電影界就有劉偉強，budget點cut，都要請茶水阿姐，畀大家有湯飲。」他說十年前演《笑の大学》，已覺做舞台劇比拍電影更「陰公」。「那時發現劇團好慘，budget不多，票價又不能太貴，排練時間比電影長好多，要很愛舞台表演的人，才堅持到。現在十年後劇場發展比較蓬勃，但都係陰公。」他望望阿祖，「你睇，編劇又係佢，演員又係佢！」阿祖笑：「慳錢嘛。」
良知沒變 繼續笑住同你神交
《Di-Dar》售票反應熱烈，加開至30多場。風車草劇作向來有fans撲飛，阿祖說阿葛一加盟，大家更踴躍：「係未試過咁熱烈！朋友平時留4張飛，今次一買就16張，姨媽姑姐全家都想睇。」最近商台公布，阿葛與林海峰8月舉行軟硬天師《拉闊音樂會》，將90年代經典電台節目《老人苑時間》搬上舞台，即引來全城fans苦叫「點會搶到飛」。阿祖當年也是《老人苑》迷：「我細個好乖好靜，回想應該與父母離婚有關，被同學歧視。後來好鍾意夜晚匿在被竇聽《老人苑》，笑到癲，覺得軟硬打電話整蠱人好正，撩起咗我靈魂深處條『曳』筋，想自己將來都可以咁！」
阿葛和阿祖都是搞笑能手，近年社會經歷巨變後，香港人很難開心，他們覺得歡眾需要的笑聲、出口或娛樂有不一樣嗎？阿葛說：「其實我覺得冇乜唔同，有良心、良知的人都沒變，差在時代不同，我要用不同的方法和他們神交。有些場合不方便咁做，咪去其他地方神交囉。這班人仍在的，他們聞到你陣除，好似聞到佢鍾意嘅臭豆腐咁，自然識搵你。」阿祖也認同，他說早幾年創作《通菜街喪屍戰》等作品，與觀眾大笑過後思考社會的事，現時環境不同，心情亦不同。如數月前風車草的正劇《亞娜》，講消逝的友情，阿祖說：「那純粹源自我一段很個人的回憶。今次《Di-Dar》我都想自high咗先，笑咗先，有個開心的創作過程。」
看過《亞娜》的阿葛，似乎很了解阿祖感受：「創作係咪要講社會狀況呢？有些人會消費咗件事，但風車草是很人性化的。早兩三年阿祖去講社會事，正因當時他真的有情緒，到現在他不想被那種情緒綁架自己了，而是在作品中宏觀地談人性，看人物角色的價值，都可以好好睇。」阿祖賣關子說，《Di-Dar》其實是他的「死亡系列」第二部曲，「第一部曲是前年的《隔離童話集》，那次所有角色死晒，在陰間被審判一生功過，《Di-Dar》則有人會死，其他人如何面對？留下還是不理他？故事底蘊可以好沉重，所以面嗰浸一定要繽紛搞笑！」
【《Di-Dar》音樂劇場】
﹒葵青劇院演藝廳場次（全部門票已售罄）
日期：8月9-11、13-18、20-24日（8pm）； 8月10-11、17-18、24-25日（3pm）
﹒香港演藝學院歌劇院場次
日期：8月29-31日及9月5-7日（8pm）；8月31日及9月1、7-8日（3pm）
票價：$680、$580、$540、$480、$440、$380、$340
購票：cityline
