90後棟篤笑藝人Jordan Leung（69ranch）言談像ABC，實情他15歲移居美國前，一直在香港成長，仲要記得肥姐沈殿霞。「細個睇電視，她一出場就可以令所有人笑，我好欣賞這種能力。」「周星馳電影也能這樣。」居美時他去酒吧看棟篤笑，開始玩埋一份，沒想到2020年疫下回港數月變滯留，自此定居做棟篤笑藝人。
今天起Jordan一連三場《Low Energy》棟篤笑開鑼，受訪時他有種招牌式的「low energy」，說話會𠵱𠵱吟吟monotone，上到台就變了冷面笑匠。他笑指與性格有關：「其實我由細到大都怕醜，現在去茶餐廳仍不敢叫侍應。早排在熟食中心食嘢，搭枱的剛好是我fans，好彩他大叫『唔該，寫嘢』，否則我有排等！」
文：凌梓鎏
圖：凌梓鎏、受訪者提供
場地鳴謝：@thefleminghk
從小搞笑 自剃眼眉出位
雖說怕醜，但要搞笑，Jordan從來自信滿滿。少時讀國際學校，他是喜歡整蠱同學的曳仔，後來去美國讀書，起初沒朋友，發覺搞笑幫到手，試過剃掉自己條眉成為焦點。「有次看NBA球賽，人人話LeBron James會輸，我話佢贏，否則我剃眼眉！結果真係輸咗。」廿多歲時他在紐約生活，會跟朋友去酒吧看棟篤笑，在當地就如睇戲唱K般平常。「在香港做騷，觀眾很多時首次看棟篤笑，換轉在美國，就好似話自己『人生第一次睇戲』咁奇怪。」
他眼見不少文化差異，「提起棟篤笑，很多香港人的reference就是黃子華。」其實坊間有一群棟篤笑藝人，如外國般都由酒吧、comedy club（喜劇俱樂部）等演出場地冒起。他在美國也是這樣起步，參加「open mic」（任何人都可付費上台講笑話的活動）累積經驗和人氣。當初為何撻著團火想入行？「因為見人講得好笑，而我肯定自己會好笑過佢。」他還報讀過棟篤笑課程，後來明明在做全職IT工作，也不上心了，笑說幾年前被炒，便回港走走，疫情肆虐被困，結果留港至今全職做棟篤笑。
Jordan中文程度有限，「最初回港做騷講英文，但我覺得真心想在這裡發展，冇理由唔講中文。這幾年我的中文已進步了很多，可以casual傾偈，睇報紙就真係唔得。」他的笑料來自日常生活，曾演出的經典笑話之一，講他疫情期間看中文AV網，唯一識睇的字是「素人」，以為是素食者女優。「那差不多是我最早期（2022年）post上網的廣東話片，開始好多人留意我。」這幾年港人移民四散，他反而選擇回流。「很多人好像放棄了香港，當然有他們的原因。我比較幸運，有option可回美國，壓力少啲。而且暫時在香港，仍做到我想做的事，亦好似有種pride，自己代表著香港一份子。」
劍神張家朗奧運奪金，Jordan隨即在IG出二創搞笑片：
Jordan疫情期間回流香港，初學中文生字「素人」的笑話：
寧可自主創作 也不要錢
去年Jordan展開首個世界巡迴《Low Energy》棟篤笑，在加拿大、澳洲等地表演，香港尾站今天開鑼。2017年由著名印裔棟篤笑藝人Vivek創辦的「香港爆笑節」，每年一度舉行棟篤笑活動，Jordan也曾參與，9月將在今屆的《爆笑節重炮開幕騷》演出。全職做棟篤笑，難不難為生？「都要做埋KOL，久不久接些廣告，加埋棟篤笑的收入，都ok啦，但唔會發達。」Jordan說，有些公司請他做私人演出，他總尷尬婉拒，大笑：「亂講話因為佢畀唔夠錢囉！做公司騷要配合它的rundown和expectation，但我不是那種風格。我寧願唔做，都唔想收錢做一個肯定不好看的騷。」
對他來說，怎樣才是一場好的棟篤笑？「有些表演者很執著場地的燈光、音響好不好，但我不care那些。其實好簡單，我有支咪，而觀眾是pay attention的，就夠了。」多年前他在紐約，試過在一大班郵輪旅客面前演出，「佢哋飲到好醉，完全冇理個騷。其他有經驗的表演者，會同觀眾講笑互動吓，就攞返啲attention，當時我唔識做呢啲。」
除了開騷從實戰學習，Jordan也有進修，年初參加了「劇場教母」甄詠蓓的演戲班。「因為有啲想識女仔⋯⋯唔係唔係⋯⋯講真，那時我常常在家，成個毒L咁，想識吓人，又想學一些可能間接幫到我做棟篤笑的事。」甄詠蓓有冇話你講嘢一嚿嚿？他笑：「有呀！但這是我的style嘛。」他說日後有機會，想嘗試電影幕後工作，但本業始終是棟篤笑。「我有set目標畀自己，想有天在紅館開騷，但太耐都做唔到就⋯⋯」何謂太耐？「如果十幾年都唔得，咁先至返美國啦。」
【Jordan Leung《Low Energy》世界巡迴棟篤笑香港站】
日期：8月1日（英語）/ 8月2日（廣東話，已售罄）/ 8月3日加開一場（廣東話）
時間：8pm
地點：旺角麥花臣場館
票價： $400 （英語場） 、$399 （廣東話場）
購票：Cityline
